曼城未上力赫斯受讓有計

猪拉多纳

上季英超盟主「藍月亮」曼城續喺蘇格蘭踢熱身賽，今晚搵咗蘇冠仔赫斯拍跳。齋睇「藍月亮」陣容鼎盛，但踢落唔多對辦，首場熱身賽更輸波收場，季前波明顯未上力，就算對住赫斯亦不宜高估，仲要讓波？梗係捧赫斯讓球主勝啦！

（TVB 301周五凌晨2時30分直播）

同曼聯、利物浦及阿仙奴等英超豪門相比，曼城今夏備戰最積極，雖然仍有阿古路、薩巴列達、高柏尼等多名世盃國腳未歸隊，但佢哋話咁快就展開熱身賽之旅，首站係北上蘇格蘭，剛周日仲同新季升上蘇超嘅登地拍跳一場，主帥比歷連尼派出捷西斯拿華斯、祖維迪、高拉洛夫等球員配搭多名副選，連新加盟嘅韋利卡巴尼路及費蘭度法蘭斯高都有亮相，可以話誠意十足，點知上半場就畀寂寂無聞嘅登地省兩粒，包括保耶達嘅烏龍波，下半場換入拿斯尼、尼格度、查維加西亞等主力亦未能平反敗局，睇得出成班波狀態認真麻麻。
藍月亮留力遠征美國

上季因破產被扣15分搞到降班收場嘅赫斯，今夏放走馬克列格斯、戴恩麥高雲、占美夏美爾等主力，但呢支蘇冠仔今個月已經踢咗3場熱身賽，2勝1負狀態唔曳，況且佢哋堅有鬥志，上季冇因早早被扣分而hea踢，奮戰至季尾先至宣布降班，今仗難得鬥同曼城，相信佢哋落力應戰。

加上曼城嚟緊會飛去美國，與曼聯、利物浦、皇馬等勁旅參加國際冠軍盃，為拓展美國市場，「藍月亮」留番啲力，喺國際冠軍盃先見真章都未遲，今晚作客赫斯讓波靠唔住，讓球主勝咪錯過。