高路高路強陣衞冕

猪拉多纳

兩間「大學」易帥挑戰

智利甲組聯賽今晚開打，今年係智利足總成立119周年，曾30次贏得聯賽冠軍、最受國內球迷歡迎嘅首都老牌勁旅高路高路，決心要延續強勢蟬聯聯賽冠軍。不過，另外兩支位於首都嘅「大學」球隊智利大學同天主教大學亦對錦標虎視眈眈，睇嚟今個春季聯賽冠軍都離不開「首都三雄」。
收購國腳包爾斯亞

智利甲組聯賽分春季同秋季兩輪賽事，每季聯賽採單循環，冠軍球隊可出戰南美自由盃。高路高路貴為上季秋季聯賽盟主，為求成功喺聯賽第31次封王，特別向英冠韋根收購國家隊中場包爾斯亞，同埋由巴甲哥連泰斯邀請前國家隊中場馬當拿度回巢，配合中場富恩沙利達，以及上季榮膺秋季聯賽神射手嘅艾斯迪賓柏利迪斯，務求以最強陣容冧莊。

曾16次贏得聯賽冠軍嘅智利大學，近兩年陷入前所未有嘅低潮，佢哋今季聘請前天主教大學教練馬田拿沙迪執掌，又從艾斯賓路拿簽入前鋒卡納萊斯，再配合多產射手雷保奧，可望為球隊帶來更多入球，重新挑戰冠軍寶座。
天主教大學地頭惡霸

至於另一支首都球隊天主教大學，曾10次稱霸聯賽，今季佢哋由前小保加教練法斯奧尼接手，兼有上季効力侯治柏度嘅箭頭拿伊奧斯加盟，配合前利物浦翼鋒麥克干沙利斯，相信能藉強勁主場戰績，擔當高路高路嘅攔路虎。