熱刺未上力難贏海灣者

猪拉多纳

今季由新帥普捷天奴領軍嘅熱刺，嚟緊會喺美國同加拿大踢3場熱身賽，今晚首戰就會作客西雅圖海灣者。論牌面，上季喺英超排第6嘅熱刺無疑比較優勝，但佢哋班球員啱啱放完暑假狀態成疑，未必頂得住呢支美職榜首球隊，不妨冷敲3.15倍主勝。

（now621台周日凌晨4:00直播）
馬田斯 丹普西歸隊

普捷天奴早喺5月底上任，點知到依家為止，球隊都仲未喺轉會市場有乜動作，只係同門神洛里斯續約5年。未有新人嚟爭位，班球員邊度識驚吖，加上射手艾迪巴約今仗唔踢得，前線得番12碼殺手蘇爾達杜同小將哈利卡尼擔大旗，加上班波開操冇耐唔慌Fit，想攻破呢支美職主場失波最少球隊？冇咁易囉！

海灣者要到月底29號先有波踢，換言之佢哋今仗可以全力出擊。據報，佢哋將會有超過5.2萬人入場打氣，海灣者實加多兩錢肉緊喺鄉親父老面前贏波攞彩。主力前鋒馬田斯、中場丹普西、守將耶迪連亦已歸隊，其中丹普西踢過熱刺，唔少前隊友個底都畀佢摸熟，贏波就更加依絲執啦！