些路迪對冰島波都冇優「細」

猪拉多纳

焗搵個欖球場做主場

今晚歐聯外圍賽將上演第2圈嘅次回合賽事，首回合作客雷克雅維克贏1:0嘅些路迪，將返番回蘇格蘭迎擊呢支冰島球隊，不過佢哋今仗有主力前鋒甘文斯傷咗未必出得，仲畀英聯邦運動會累到冇得用番自己主場，贏都未必炒得起，1.75倍入球細抵捧。

（開賽時間：周三凌晨2:45）
射手甘文斯拉傷大腿

些路迪依家手握一個作客入球，加埋雷克雅維克實力本身唔強，主隊其實冇乜必要亂攻，不過今場呢支蘇超班霸隨時想攻都攻唔到，因為上季上陣48場勁入32球嘅甘文斯，喺上仗熱身賽鬥特雷斯登取得「士哥」之後不慎拉傷大腿，今場隨時缺陣，冇咗呢位箭頭，鋒力勢必大打折扣。

今場些路迪仲有個壞消息，就係用開嘅主場些路迪公園，嚟緊要用作舉辦英聯邦運動會開幕典禮，所以今鋪呢支蘇超球隊只可以用蘇格蘭欖球聯會嘅主場梅里菲特球場作賽，要喺唔熟悉嘅場地打波，始終會令主場優勢大縮水，火力唔打個八折至奇。至於作客嘅雷克雅維克雖然係冰島超衞冕冠軍，但水平始終同蘇超相去甚遠，主場都破唔到蛋，嚟到作客更難有咩作為，入波又點會多吖？
首回合：些客勝1:0