迪科爾倒戈做大騷

猪拉多纳

FC多倫多熱刺有前冇後

英超勁旅熱刺展開北美之旅第2站，明早將會前赴加拿大作客FC多倫多，後者雖然近期場場有失波，但陣中弗爆射手迪科爾正係熱刺舊將，熟路之下可能搵到着數，不過熱刺攻力亦唔嘢小，鬥攻格局隨時合演入球騷，轉玩大盤好過。

（now 621周四早上7時直播）

在美職位列中游嘅FC多倫多近7仗只嘗1敗，表現唔曳，不過近6場都未能保住清白之身，其中有5場更係先失波，防線唔集中嘅問題未有改善迹象，好彩佢哋有一對前英超鋒線孖寶──勞基摩亞拍住迪科爾攻堅，後者唔單止喺聯賽轟入11球，暫列射手榜第4，佢仲係熱刺舊將添！對住一班舊隊友可謂瞭如指掌，由於熱刺高大守將如戴臣、卡保奧等出晒名轉身慢，日前喺美國首站造訪西雅圖海灣者竟然狂失3粒，表現慌失失，比利時後衞維頓漢又未歸隊，遇上矮小靈活嘅迪科爾，隨時會畀呢位前英格蘭國腳恰死。
二線球員博表現

不過，熱刺畢竟係英超勁旅，新領隊普捷天奴上任冇耐即大派定心丸，講到明會觀察現有班底為主，唔會貿然大舉換血，至今未有買入新球員，令上季被外借或投閒置散嘅二線球員賀治比、耶高法爾基、蘇爾達杜、拉美拿等球員重燃戰意，上仗正係靠前三者嘅入波以3比3逼和海灣者，打出具壓迫性嘅進攻足球，佢哋勢必食住個勢喺普帥面前爭取表現。既然兩軍都係屬攻強守弱，熱身賽場合更會鬥攻，入球大值博。