鹿島狀態曳 松鼠借細發圍

猪拉多纳

日職今日加開快車，準備入信彈劾上場波執法球證嘅鹿島鹿角，主場迎戰護級分子大宮松鼠，未必炒得起對手，衰起上嚟和都唔奇，2.25倍入球細值得一博。（有線64、203周三晚6:00直播）

鹿島過去响主場12戰大宮，取得9勝2和1負，數據完全偏向佢哋，本來值得睇高半線，但係呢班波今季表現麻麻，世盃期休戰前得2勝3負，球季重開之後，更加喺日皇盃射12碼輸畀FC仙台，上場聯賽作客逼和FC東京，全場得3腳射門，上半場直情冇射過，狀態真係好差。就算前主帥薛高今日趁住返日本拍廣告，抽空入場打氣，恐怕都谷唔起隊波。
鹿島「得罪」球證

最重要一點係，日職今輪起球證、旁證會透過無線電系統聯絡，希望減少誤判，呢點表面上有利鹿島，事關佢哋上場對FC東京就遇到唔少「不公平判決」，激到佢哋準備入信投訴球證。不過，佢哋咁高調鬧啲黑衣判官，同啲球證企硬，好容易畀人針對，況且中場路爾斯艾拔圖停賽，前鋒赤崎秀平膝傷摺埋，焗佢哋要依賴達維、卡奧盧卡斯兩件巴西兵搵食，好易畀大宮徹底凍結。

排緊尾三嘅大宮，目前要搏命搶分護級，仲趁休戰期簽咗塞爾維亞前鋒美迪查、「韓國加度素」趙源熙增強中前鋒實力，搭埋件前日本國腳家長昭博，人腳絕對唔曳，上場連追3球逼和廣島三箭更加係威係勢，今日搶1分唔難。