關西打吡飛腳踢沉勝利船

猪拉多纳

如果齋睇排名，日職排名第6嘅神戶勝利船今日主場出擊，理論上贏面大過客軍大阪飛腳，但係呢場係「關西打吡」，唔能夠用常理推論，平手盤不妨博吓1.92倍嘅飛腳。

（有線62及202周日晚6:00直播）

呢場日職地區大戰，又稱為「阪神打吡」，過去神戶15次主場迎擊飛腳，打成6勝3和6負嘅均勢，但係有樣嘢好邪吓，就係神戶每逢7月遇着飛腳都唔多着數，4次交鋒得03年贏過1次4:3，其餘3次有兩次輸1:3，最近2012年嗰劑就和1:1，主場冇乜優勢可言。
勝利船馬昆奴斯J咧300戰

而且打波最重要唔只往績，近態比乜嘢都關鍵。講到呢方面，神戶肯定及唔上飛腳，佢哋响日職重開之後，連續兩場未贏過，前鋒表現乏力，38歲老將馬昆奴斯响打和橫濱水手場波，雖然創造咗日職300戰嘅紀錄，成為第一個外援達到呢個里程碑，但係對隊波根本冇幫助。

相反飛腳就好似打咗針咁，聯賽兩連勝無失球齋入6球，箇中關鍵除咗宇佐美貴史回勇，巴西新兵安達臣柏德列開始融入隊波，令到飛腳回復全盛時期嘅喪攻本色。日本totoOne編輯部嘅數據推介都話，呢場係「亂戰」，不過飛腳贏面有41個巴仙，比神戶高4個百分點，平手盤博客隊冇壞。