美職主場6連勝Fit到漏 海灣者強攻銀河難捱

猪拉多纳

聽朝美職獨腳戲上演攻防對決，由西雅圖海灣者迎戰洛杉磯銀河。「進攻王」海灣者唔單止進攻煞食，近期主場仲相當守得，相反「防守王」銀河連續10場不敗斷纜後，再吞曼聯7隻光蛋令士氣受挫，海灣者讓平半一於捧上盤。

（TVB301周二早上10:00直播）

環顧美職聯賽，總入球超過30球嘅球隊，最少都踢咗20場，海灣者踢18場就入咗35球，進攻王稱號當之無愧。呢班波最近主場表現勢如破竹，聯賽保持6連勝不特止，仲連續344分鐘冇失過波，今場丹普西、馬高柏巴、耶迪連等三線猛將候命搏殺，唔難延續連勝強勢。

銀河上輪聯賽不敵肯薩斯體育會，美職同美聯盃連續10場不敗走勢告終，跟住喺雪佛蘭盃同曼聯對壘，當路雲、薩迪斯、羅比堅尼等主將先後落場，可惜最終都要慘吞7蛋。

呢場話就話係熱身賽性質，但咁輸法對球員士氣實有影響。銀河後衞丹格根今場坐完波監復出，弊在另一後防主將奧馬干沙利斯腳踝受傷或缺陣，防線唔齊腳應難頂海灣者攻勢。