斯巴達搵馬模 做細界

猪拉多纳

歐聯第3圈外圍賽首回合今晚展開，捷甲球隊布拉格斯巴達將會喺主場迎戰上季瑞超盟主馬模。前者主場威力驚人但狀態未完全操起，後者防線最近表現唔差，幾難出現大手交易，1.82倍入球細有得諗。（開賽時間：周三凌晨1:30）

布拉格斯巴達上季勇奪捷克甲組聯賽冠軍，當中球隊主場威力驚人，取得15場全勝佳績。照計佢哋今晚對住實力唔算高嘅馬模理應實食冇黐牙。不過捷甲啱啱先開鑼，計落布拉格斯巴達今個月夾埋先踢得嗰4場正式比賽，一班球員上晒力未實屬疑問。
馬模防守力一流

至於上季瑞超冠軍馬模狀態比較優勝，雖然球隊喺世盃舉行期間休戰1個月，但對於打咗接近半季嘅馬模嚟講，有得畀班球員叉電抖吓唔係咩壞事。而且佢哋喺世盃後亦冇走樣失準，取得3勝3和仲只係失得3球咁少，以列卡甸奴、希蘭達為首嘅防線表現唔曳。雖然話射手莫連斯仲未好番，但咁樣反而仲好，馬模可以一心死守等次回合返主場先埋牙，布拉格斯巴達都唔係咁易咬得入o架。