阿些斯奧陣容超班勒唔住

猪拉多纳

新一季笛子波童會繼續同大家分析法國波，法乙周六凌晨搶閘開鑼，上季法甲排包尾嘅阿些斯奧作客鬥阿勒斯。阿些斯奧雖然放走唔少主力球員，不過補充番嚟嘅新兵唔少亦有法甲經驗，計實力喺法乙應該游刃有餘，今場阿些斯奧受讓當然捧讓球客勝。

（周六凌晨2時開賽）

阿些斯奧上季法甲排包尾，今季降落乙組角逐，離隊之中最具名氣係於巴西世盃踢到曉飛嘅墨西哥門將奧祖亞，另外中前場球員泰路加治、班捷文安達、施加馬利迪亞拉及後衞羅倫邦納特均已他投，戰鬥力難免減弱，好彩去季季中上任嘅教練巴斯高尼識得「睇餸食飯」，今個夏天買入嘅新兵絕對唔係求求其其。前鋒法華古爾効力里爾超過七個球季；馬里後衞簡迪踢過尼斯、索察及彭拿典奈高斯，至於穿上10號球衣嘅二十歲小將昆坦尼拿係巴塞隆拿青訓產品，配合原有嘅前法國國腳柏達堤、前馬賽中堅蘇巴，呢個骨幹陣容喺法乙嚟講算係數一數二。
阿勒斯削6成功力

阿勒斯上季法乙排十三，只比降班區域多六分，成績唔算突出，今季佢哋亦有多名主力離隊，包括首、次席射手梅里斯達利、拿巴及中場迪高斯，三人上季合共入咗二十三個聯賽入球，要知道阿勒斯全季都只係入咗三十六球，即係三人入球總數量佔球隊六成以上，影響之大可想而知，首戰就算主場出擊都唔值得睇好，波童一於捧讓球客勝。