紐倫堡厄運未除

猪拉多纳

人腳變動大 磨合需時

今晚德乙直播賽事，剛從德甲降班嘅紐倫堡坐鎮主場迎戰奧厄。紐倫堡降班後流失祖斯比迪米斯等不少具級數主力，雖買入大批新兵但磨合需時，況且新帥艾斯美經驗不足，就算有地利都未必能打響頭炮，不妨撐受讓嘅奧厄讓球客勝。

（有線64、203及18台周日晚9時30分直播）

喺德甲打拚咗五季後，一向限米煮限飯嘅紐倫堡終於捱唔住降落乙組，呢類球隊通常都留唔到陣中主力，榮膺上季德甲第三射手嘅瑞士國腳祖斯比迪米斯即成搶手貨，一收咧就畀利華古遜「擸走」，「新香川真司」清武弘嗣則改投漢諾威，今夏紐倫堡賣走咗十幾個球員，同時又一口氣買番十幾人，包括慕遜加柏前鋒穆拉柏及上季効力奧厄嘅德乙神射手積及施域斯達，理論上人腳喺乙組夠殺，只係經歷咁大動盪，無論係打法同默契上都需要時間磨合。
新帥艾斯美冇教波經驗

今季紐倫堡連主帥都換埋，由漢諾威二隊教頭艾斯美接手執教，但呢位薄有名氣嘅前拜仁及不來梅鐵衞，毫無執教職業球隊經驗。其實對手奧厄亦唔係好貨色，賣走積及施域斯達令攻力受削，但唔似得紐倫堡咁大變動，早前喺熱身賽力戰甲組嘅史特加都只係輸一粒，睇得出佢哋季前狀態唔錯。斯維唔懷疑紐倫堡嘅質素，不過預計季初會經歷一段陣痛期，不宜高估，加上荷夫蘭及丹尼布林因傷倦勤，呢班波睇定啲先捧喇，讓球主客和奧厄受讓一球有2.37倍，值得捧場。