槍手爭上位射爆摩納哥

猪拉多纳

地頭出擊 點可以失威？

阿仙奴前幾年似商舖多過似球會，只要畀得起錢，隊長都可以賣走幾件，結果搞到有錢袋、冇盃捧。好在「兵工舖」上季終於痛定思痛，掟錢買入中場奧斯爾，終於打破冠軍荒，佢哋今季再接再厲積極增兵，擺明要重振雄風，今晚主場對住仲未開水喉嘅摩納哥，肯定有殺錯冇放過，一於捧主勝啦！

（TVB301周日晚11:20直播）

阿仙奴近年係咁賣人賺錢，成日同獎盃無緣，但隨住佢哋上季放棄「幼齒政策」，一反常態重金禮聘德國中場奧斯爾「入廠」，結果成功捧走足總盃，打番起晒班球員嘅信心。領隊雲格今季食過翻尋味，一口氣簽入翼鋒阿歷斯山齊士、右閘迪保治、門將奧斯賓拿等即食球員，目標明顯劍指英超，今晚出戰最後一場酋長盃，又點可以失威先？
A山披甲西班牙孖寶候命

雖然奧斯爾、梅迪薩卡同普多斯基3件德國兵仲放緊假，不過法國射手基奧特、西班牙一對中場阿迪達及辛迪卡索拉都已經歸隊候命，陣容尚算完整，而且幾件新兵好似A山、迪保治都有機會披甲，成隊波仍然具有一定級數。有消息指雲格打算繼續買人加強實力，當中包括基迪拉、馬高列奧斯等都係目標，眾現有槍手為確保新季正選位，點到佢哋唔搏？
摩納哥賣星用二打六頂檔

摩納哥自從升上法甲後，變成轉會市場大豪客，不過嚟到今季，呢間豪門出多過入，前鋒利維亞、中場占士洛迪古斯同後衞艾比度齊齊走人，新兵大部分都係二打六，當中只得圖盧茲中堅艾登路亞叫有啲名氣，實力大幅削弱。

最重要嘅，係摩納哥今季改由前士砵亭教練查迪姆執教鞭，呢位新帥上場冇耐，就要不斷處理主力離隊嘅問題，邊有時間摸清自己班手足嘅底細吖，今晚去到「兵工廠」地頭，破到蛋都有交代喇！
Data King：兵工廠酋長盃旺開大

‧阿仙奴對上4屆酋長盃共8場比賽，總共開出6大2細。

‧阿仙奴歷來12場酋長盃開出8單4雙。

‧摩納哥上季聯賽作客半場開出7大12細。
乜都玩錦囊：阿仙奴強鋒做「大」事

阿仙奴季前買咗「智利C朗」A山，配合原有人腳，鋒力勁到得人驚。不過「兵工廠」上季正選右閘沙格拿離隊，啱啱來投嘅迪保治未必可以即時融入防線，好易出事，況且摩納哥有貝碧托夫、摩天奴等擅射球員壓陣，阿仙奴即使贏波，都未必保得住清白身，入球大諗得過。