紅魔搏老命 搶盃氹尹帥

猪拉多纳

國冠爭霸英超天下 曼聯紅軍聽朝埋牙

「新魔王」爭第一冠！國際冠軍盃決賽爆「雙紅會」，利物浦同曼聯兩支英超宿敵喺邁阿密爭標。自從「啤神」尹戈爾上任後，曼聯嘅演出勁掂，朗尼、艾舒利楊格同費查喺佢套「尹氏Tiki-Taka」戰術下脫胎換骨，對住「無鋒」利物浦實食冇黐牙，一於捧紅魔2.1倍客W，見證尹戈爾奪上任第一冠！

（有線61及201周二早上8:00直播）
尹戈爾被爆躁底操啤輸咗反枱

可能大家會話：「國冠盃？季前賽嚟啫！」冇錯吖，但對於曼聯球員嚟講，國冠盃唔淨止熱身賽咁簡單，皆因新帥尹戈爾一早講明會藉美國行考察球員，唔啱使就即刻要扯，咁嘅情況底下，班「紅魔鬼」梗係搏晒命啦！尹戈爾啤友巴榮尋日向英國《太陽報》爆料，指尹帥爭勝心極強，即使平時鋤啤只係玩25歐元一鋪，但啲牌一唔靚，尹戈爾就會拍枱拍櫈，試過有次仲激到反枱，搞到成地紅酒添！惡成咁，班球員點敢唔赦佢？

曼聯喺國冠盃A組以2勝1和靚績躋身決賽，尋日仲憑楊格梅開二度加上查維亞靴南迪斯入波，以3:1大勝皇馬添。當中以第1個「士哥」最精彩，除咗迪基亞同桑馬達，其餘球員都有參與攻勢，連續傳足20腳波後由楊格建功，水銀瀉地嘅「尹氏Tiki-Taka」好睇又好食，就算尹戈爾證實尹佩斯因為唔夠態，季初要做後備都唔使驚。
利物浦「史獨」拉傷腿筋返英治療

由於曼城喺最後一場B組賽事射輸12碼畀奧林比亞高斯，利物浦尋日未贏AC前已篤定殺入決賽，所以領隊羅渣士都留力，冇派謝拉特、荷西安歷基同史卡迪爾等主將落場，預期呢班球星聽朝會悉數上陣。可惜自從會方將蘇亞雷斯賣畀巴塞之後，陣營真係冇一位「士哥手」畀到人信心，史杜列治更喺昨仗拉傷腿筋返咗英格蘭療傷，靠仲未同隊友夾熟嘅列基林拔擔大旗，唔太信得過啫！