里爾再捉草蜢

猪拉多纳

主帥激將法 前鋒博上位

今晚先上演四場歐聯第三圈外圍賽次回合，其中法甲勁旅里爾主場迎戰瑞士超球隊草蜢值得留意。唔好以為里爾揸住兩球在手就hea踢，主帥吉拉德賽前刻意使出激將法，講到明冇邊個前鋒係必然正選，適逢草蜢「冇前冇後」仲要焗攻，文迪斯達加卡及路蘭洛斯等里爾前鋒必定趁機入多幾粒，直取讓球主勝。

（周三凌晨2時30分開賽）

近期對里爾天大喜訊，莫過於以1,000萬鎊將陣中小將奧歷治賣畀利物浦，但佢今季會借番畀里爾磨練，一年後先正式為紅軍効力；不過喺歐聯第三圈外圍賽，又使乜呢名比利時歷來喺世盃最年輕建功者出手呢？睇番首回合作客草蜢，諗住佢哋未開咧狀態麻麻，可能會苦戰一場，點知里爾打得相當輕鬆，其中文迪斯達加卡猶如個人騷，憑住呢位佛得角群島箭頭一傳一射輕勝2比0，今夏出戰世盃嘅尼日利亞「淡定哥」門將安耶馬與科特迪瓦前鋒沙洛文卡勞，該仗全程坐喺後備席睇波，慣常正選奧歷治更加連後備都冇份，見到文迪斯達加卡弗到漏油，完全反映出殺雞唔使用牛刀。
草蜢落後兩粒焗攻

無論於實力或歐聯經驗，草蜢本身已差里爾幾條街，何況佢哋喺瑞士超首三輪錄得一和兩負排尾三，狀態死火，搞到做過德國隊助教嘅主帥史基比頭都痕埋。最弊係日前聯賽悶和錫永之役，正選門神丹尼爾達華利完場前遭對方踢傷被迫退下火線，未必能趕及今仗披甲。由於草蜢落後兩粒，今仗硬着頭皮焗攻，但睇番近四仗正式賽事，只得一場有士哥，去到里爾地頭盞死多兩錢重。況且里爾主帥吉拉德話明陣中幾名前鋒需要競爭，冇人係必然正選，相信里爾眾將實行贏多幾粒，讓球主勝咪錯過。
吼巴迪2.15倍晉級

另一場歐聯外圍賽次回合，白俄羅斯勁旅巴迪返主場火併匈牙利球隊迪比辛，後者首回合只靠一球12碼奠勝，表現唔太標青，巴迪一眾主力如保耶高夫及禾洛高等全部可以披甲，有力收復失地，主W得1.48倍冇肉食，不妨轉玩「晉級隊伍」捧巴迪，有2.15倍分頭唔錯。

（周三凌晨1時30分開賽）