拜仁大騷娛賓

猪拉多纳

志在冧fans喪攻美職明星

勁爆熱身賽停不了，啱啱打完國際冠軍盃，輪到德甲班霸拜仁慕尼黑接棒，聽朝喺美國之旅第二站波特蘭硬撼美職明星隊。雖然拜仁主帥哥迪奧拿話剛歸隊嘅德國國腳唔會有太多上陣時間，但列貝利、羅拔利雲度夫斯基、比沙路等火力全開絕非人咁品，美職明星隊由「高貝利大帝」亨利率領一眾前英超球星迎敵，呢類熱身賽志在娛賓，雙方有前冇後隨時合演入球騷，大盤乃不二之選。(TVB 301周四早上9時30分直播)

拜仁一眾德國國腳如拿姆、紐亞、馬里奧葛斯、湯馬士梅拿等，由於踢到七月中捧走世盃冠軍，加上踢到4強階段嘅洛賓及丹迪，佢哋都抖到今周先歸隊，「小豬」舒韋恩史迪加更因傷額外獲得多兩周休息。有見及此，主帥哥迪奧拿講到明佢哋今仗最多輕舒步頭，甚至唔使上陣等佢哋抖多啲。
列貝利拍羅拔仔有火花

其實上周五喺新澤西，拜仁已進行咗美國之旅第一站嘅熱身賽，並靠老將比沙路一箭定江山擊敗瓜達拉哈拉，好似「羅拔仔」羅拔利雲度夫斯基、阿拉巴、施巴斯坦路迪、拿菲爾等冇份踢世盃嘅球員亦逐漸上力，而因傷緣盡世盃嘅「國王」列貝利上仗仲交出助攻，睇得出佢已急不及待想一吐烏氣，拍住「羅拔仔」嘅新攻擊組合唔講得笑。

美職明星隊亦唔嘢小，前阿仙奴射手亨利雖然速度不如當年，但其臨門一腳依然夠辣，仲有「美國隊長」丹普西、卡希爾、迪科爾、羅比堅尼、馬田斯、當路雲等前英超球星壓陣，星光絕不遜於拜仁，加埋格拉咸素斯、馬特比斯拿、耶迪連等美國國腳，經驗活力俱備。

最重要係呢類熱身賽勝負無關痛癢，志在令球迷睇得開心，因此打得零舍開放，睇番美職明星隊近年出戰羅馬、車路士、曼聯等外隊，經常出現大手交易，況且拜仁改踢三後衞陣式，鬥攻之下實多波入，大盤有買趁早。