伊巴恰慣蘭斯 PSG誓響頭炮！

猪拉多纳

歐洲聯賽戰火重燃

法甲開鑼，亦即意味住歐洲聯賽即將全面開打，球迷們準備好未先？蘭斯今晚喺主場對巴黎聖日耳門，想搶分都幾難，因為聖日耳門今季有「爆炸頭」大衞雷斯加盟，教練白蘭斯用5,000萬鎊買個中堅番去，梗係唔想衰畀老細睇啦，加上伊巴謙莫域弗爆，上次對蘭斯又有士哥，1.98倍「讓球客勝」抵玩呀！

（TVB302周六凌晨2:30直播）

蘭斯前季升班後，連續兩年護級成功，但正因為教練科尼亞太叻，所以被里昂挖角，新教練維素安原本執教格迪爾，上季領軍拎到法乙第11名，成績總算不過不失，但弊在蘭斯冇錢使，今季主要得南錫翼鋒莫簡祖同羅連安特中堅保尼隆加盟，上季蘭斯兩循環對聖日耳門都吞3蛋，點似爆得出呀？
大衞雷斯未必踢正選

聖日耳門今季放走中場文尼斯、京士利高文同中堅阿歷士洛里高，只不過簽咗進攻型中堅大衞雷斯補充實力，燒錢唔夠多？因為佢哋怕違反國際足協嘅公平競技條例，所以咪勒住囉，不過買個後防球員都要5,000萬鎊，教練白蘭斯又點敢喺開咧戰失威先！雖然大衞雷斯報到冇耐未必正選披甲，但PSG星光熠熠，是但搵一件頂上都OK，與其擔心個陣，大家不如等睇聖日耳門表演好過啦！
PSG亞洲行2勝着晒火

係，聖日耳門對上8季聯賽開咧戰，得1勝4和3負，不過今季有啲唔同，事關佢哋剛啱捧完法冠盃，呢班波已經撻着晒，點同往年一嚟就埋牙先！最近聖日耳門去香港同北京比賽，都擺出一副要贏波大勝嘅氣勢格局，伊巴謙莫域仲勁有火，上次對賽又有士哥，淨係佢一個，都玩死蘭斯啦！
Data King：PSG上季法甲攻守王

‧聖日耳門上季法甲入84球最多、失球23球最少。

‧聖日耳門上季聯賽作客12勝5和2負，得勝率達63%。

‧蘭斯連續5場熱身賽開入球細。
乜都玩錦囊：玩埋波膽博蘭斯吞蛋

蘭斯上季主場同作客對巴黎聖日耳門，都係輸0:3，今季佢哋嘅實力冇特別提升，再遇聖日耳門唔似破到蛋，假如大家嫌「讓球客勝」唔夠肉食，可以考慮下玩埋PSG贏2:0或3:0波膽，博起個孖！