布力般執靚個陣打藍鳥

猪拉多纳

主力留隊 增加板櫈深度

新一季英冠今晚正式揭開戰幔，由布力般流浪主場迎戰卡迪夫城。布力般上季雖然連升班附加賽資格都攞唔到，但領隊加利保耶成功留住陣中主將，並喺今夏增兵補強，實力進一步提升。「藍鳥」卡迪夫城喺英超墊底降班後，逃唔過被「肢解」命運，費沙甘保等三線核心成員先後被撬走。兩隊組軍情況各走極端，咁梗係捧2.15倍主勝，撐布力般打響頭炮！

（TVB301周六凌晨2:45直播）
射手佐敦洛迪斯 繼續孭飛

咪睇布力般上季冇份爭升班，佢哋喺季尾踢出一段12戰6勝6和不敗成績，最終第8名衝過終點，絕對唔能夠睇小。今季捲土重來嘅布力般，積遜路維、卡亞尼同湯美史浦等中後場主將全部留效外，上季貢獻25球嘅首席射手佐敦洛迪斯亦繼續喺前線孭飛，成班波夾慣夾熟，進攻防守自不然得心應手。

至於教頭加利保耶為漫長球季鋪路，季前羅致經驗豐富箭頭基斯布朗、後衞巴迪斯迪等球員增加板櫈深度，陣容執到咁靚，絕對夠資格爭升班，點可以唔撐o架。
卡迪夫城三線骨幹被「肢解」

另邊廂，由蘇斯克查領軍嘅「藍鳥」，除咗威爾斯球星比拿美掛靴令鋒力大減外，中堅哥爾卡同中場佐頓梅治先後轉投昆士柏流浪，中鋒費沙甘保亦過檔水晶宮，三線骨幹成員全部被挖角，影響肯定唔細。

雖然蘇帥斟掂幾名箭頭加盟，不過馬捷達名大於實，查維亞古艾拿已經步入黃昏期，只得前雷丁射手方祖叫做當打，但缺乏磨合之下，亦不宜抱太大期望。即使「藍鳥」最近3次對碰贏晒，但今場真係捧唔落手囉。