前鋒轉運破紅鑽

猪拉多纳

應援baby好腳頭

日本靚女多，好多仲識波，就好似現時「三哥」川崎前鋒咁，兩個baby阿井莉沙同木村朱美都好省鏡。川崎前鋒近季成績唔算好，但自從有兩位baby支持後，今季戰績大躍進，射手大久保嘉人都愈來愈醒神，佢哋今輪日職對決硬撼浦和紅鑽，到時仲有全新吉祥物面世，梗係想贏波助興啦，睇落贏面高啲啦，平手盤值捧。

（有線61及201台周六晚6時直播）

阿井莉沙係當地女優，唔好心邪唔係AV女優，呢個姐仔02年出道走清純路線，都幾飲得杯落。至於木村朱美曾經拎過國民女少女獎，星途唔算好順利，但成為川崎baby後，起碼多咗男球迷認識。日職應援團對球隊作用好大，有靚女自然多啲男球迷入場，喺第十二人打氣之下，球隊自然落力啲。睇番佢哋主場成績，9戰5勝2和，入16球係日職主場入波最多球隊，老牌前鋒大久保嘉人有料到，今場對浦和紅鑽，坐和望贏Feel。
砂岩無王管恐中「箭」

至於榜首鳥棲砂岩，各位追開佢哋嘅巴打小心踩地雷，球隊今仗作客廣島三箭形勢上原本勢均力敵，不過尋日突然傳出，砂岩教練尹晶煥已經劈炮唔撈，聽講佢同球會傾下季合約嘅時候，因為不滿待遇同高層吵大鑊，所以好有型咁即走，今場砂岩由助教吉田惠領軍，或者尹晶煥可以做打工仔偶像，但砂岩咁辛苦至搶番榜首，真係多得佢唔少，捧對家三箭好過。

（周六晚6時開賽）