皇馬首晒鑽石同花順

猪拉多纳

西維爾蛇仔即冚旗

歐洲超級盃周三凌晨上演西甲打吡，歐聯冠軍皇家馬德里大戰歐霸盃盟主西維爾，賽事安排喺威爾斯卡迪夫城球場舉行，皇馬天價快翼加里夫巴利衣錦還鄉，必獲鄉里齊撐，變相令「銀河艦隊」擁半個主場之利。加上兩位星級新兵占士洛迪古斯、卻奧斯將會上陣，配合賓施馬同C朗，主帥安察洛堤首次排出「鑽石同花順」組合攻堅，勢必炒起實力只屬「蛇仔」級數嘅西維爾，直取讓球主勝。

（有線61、64、201及203台周三凌晨2時45分直播）
巴利仔榮歸威爾斯

出生於加的夫嘅加里夫巴利已成當地英雄，今屆歐超盃33,000張門票迅速售罄，除咗對賽雙方各分配4,000張外，其餘幾乎被威爾斯球迷掃晒，換言之今仗看台上超過8成觀眾係支持加里夫巴利同皇馬，氣勢已經贏晒。

講到人腳，兩軍就更冇得揮，世盃後一直休假嘅占士洛迪古斯、卻奧斯、賓施馬早前已歸隊操練，加上巨星C朗，意味身穿7至11號嘅「五星連珠」將首次聯手攻堅，威力非同小可。雖然佢哋未必處於最佳狀態，但由於球隊有「星滿」之患，各人正選位置未穩，而且亦唔想被隊友比下去，為位置、為面子，都要搏命。另外，皇馬經過美國之旅3戰不勝嘅慘淡表現後，教練安察洛堤今次應該會嚟真，以免開壞個頭，影響新球季爭標士氣，必大打真軍，唯一不利消息係沙比阿朗素停賽，稍稍削弱咗中場截擊力。
主力被撬新將平庸

西維爾話就話係歐霸盃冠軍，但上季西甲少皇馬足足24分，雙方近10次交鋒西維爾亦輸咗8次，當中6次淨輸兩球或以上，包括上季作客慘敗3比7，足見雙方級數其實係有一大段距離。西維爾今夏痛失兩位主力拿傑迪錫同迪亞高柏洛堤，前者上季聯賽有12球進帳，屬於球隊中場大腦，佢轉投巴塞，對西維爾打擊好大。

至於伊亞高艾斯巴斯、丹尼斯蘇亞雷斯等新兵質素平庸，恐怕作用有限，以牌面計，西維爾現有人腳點計都只係「蛇仔」一條，撞正人哋同花順，自然要冚牌投降！Mic少認為皇馬大捷可期，讓球主勝可放心捧場。