歐超盃撼西維爾 皇馬同花順大晒!

猪拉多纳

皇馬今晚喺歐洲超級盃對西維爾，有C朗重返正選陣容，加上占士洛迪古斯首次登場，配合埋加里夫巴利、卻奧斯同賓施馬，呢條7至11號嘅同花順大把本錢同西維爾開入球騷，而且門神卡斯拿斯近期大跌Watt，入球大細中位數開到3/3.5球都照捧1.85倍大！（有線61、64、201、203及中央5台周三凌晨2:45直播）

歐洲冠軍皇馬喺國冠盃陣容不整，連輸3場非戰之罪。睇番C朗（7號）好番冇耐，已經忍唔住以後備身份復出倒戈對曼聯，加上沙比阿朗素停賽，造就卻奧斯（8號）好大機會打正選，同時賓施馬（9號）已歸隊，占士洛迪古斯（10號）預料會處子登場，配合埋加里夫巴利（11號），呢條同花順冇乜球隊能夠頂得住！
「決賽專家」聖卡斯陷信心低谷

賽前皇馬教練安察洛堤，話歐超盃好重要點都要贏。數據上兩隊近7次對賽有6次開入球大，期間皇馬更加有3次以「其他」賽果勝出，當正對方殺父仇人一樣。皇馬今夏喺轉會市場使咁多錢，嚟到歐超盃點都會搏殺攞頭威，起碼新人要爭表現，舊人亦要騷「哥利」先啦！不過門神卡斯拿斯雖然係「決賽專家」，佢為皇馬打過9次決賽贏咗7次，不過佢近期狀態大跌Watt，搞到畀「艦隊」球迷喪鬧信心跌落谷底，皇馬入得波嚟亦隨時保唔住清白之身。
西維爾曾經衰喺安帥手上

對手西維爾過往踢歐洲賽決賽勝率好高，5次踢終極冠軍戰有4次贏波，唯一衰嗰次係07年歐超盃不敵AC米蘭，對手教練正正就係安察洛堤！呢班波近期喺熱身賽表現唔錯，而且今季只得中場拿傑迪錫轉投巴塞影響最大，好在同時有利物浦前鋒伊亞高艾斯巴斯、 巴塞中場丹尼斯蘇亞雷斯同艾美利亞中場阿歷斯維度加盟，牌面冇乜削弱，有本錢喺可能會發波瘟嘅卡斯拿斯身上省番一兩粒！
Data King：皇馬3戰僅2002年捧盃

‧皇馬3戰歐超盃僅2002年捧盃。

‧西維爾兩戰歐超盃，曾於2006年捧盃。

‧以法定時間90分鐘計算，近5屆有4次開入球細。
歐洲超級盃賽制

比賽以1場決勝負，法定時間內打和將加時30分鐘，再和互射12碼分高下。