聖羅倫素搶盃炒起國民會

猪拉多纳

南美自由盃決賽聽朝會上演次回合賽事，阿根廷球隊聖羅倫素回師主場迎戰巴拉圭球隊國民會。聖羅倫素首回合同對手打和1比1，今仗返到主場，以佢哋主場強勁嘅火力，面對作客表現一般嘅國民會，阿King相信聖羅倫素有力大勝對手捧盃，不過主W冇肉食，一於捧2.1倍讓球主勝。

（周四早上8時15分馬會網上文字直播）

聖羅倫素首回合作客同國民會踢成1比1，今仗只要贏國民會就可以封王，聖羅倫素主場生猛，對上3場主場賽事攻入9球，當中包括自由盃4強大數玻利維亞球隊玻利瓦爾5比0。阿King相信佢哋今仗仍會繼續進攻，務求喺主場球迷面前漂亮地贏波捧盃。而且聖羅倫素嘅阿甲開咧戰因遷就呢場自由盃決賽而改期，球隊養精蓄銳下更着數。
國民會冇得抖體力輸蝕

國民會現時形勢非常不利，今場作客已經蝕底，加上佢哋出征前仍要踢本土聯賽，雖然以副選出戰但始終有影響，面對前線有莫路麥圖斯、白蘭迪及羅馬洛尼壓陣嘅聖羅倫素，相信難擋對手，阿King睇好聖羅倫素今仗起碼贏一球以上捧盃。

另外挪威盃嚟到8強階段，莫迪上仗打和史達比克可說已走出歐霸盃出局嘅陰霾，球隊今仗有主力前鋒古白蘭辛復出，主場面對近期表現反覆嘅維京有望贏起碼兩球，捧讓球主勝。

另一場史達比克主場對侯格辛特，主隊上仗落後兩球下仍可逼和莫迪，可見球隊攻力不錯，加上今場對手侯格辛特前鋒基特積亞近期頻頻入波，狀態甚弗，兩陣今仗交鋒有望上演入球騷，捧入球大。