卡斯洛達斯巴達牛豬大會

猪拉多纳

今晚俄超「牛豬大會」有直播！綽號「公牛」嘅卡斯洛達主場迎戰人稱「豬隊」嘅莫斯科斯巴達，兩軍對今季都寄予厚望，今仗同樣以三分為目標，勢必合演對攻好戲，1.82倍大盤係投X首選。

（now 670周五凌晨1時直播）

「公牛」卡斯洛達雖然未算係俄超豪門，但呢支成立只有6個球季嘅新貴，每季進步神速，而且踢法悅目，已被視為俄羅斯足球嘅未來希望，球隊今季史上首次參戰歐霸盃，頭兩輪遇弱旅，4場比賽合共轟入17球，保持歐戰全勝之身，雖然聯賽頭兩場都只係和波，但兩場都係作客，今仗首度主場出師當然希望打開勝利之門。
傳奇助教迪漢諾夫倒戈

卡斯洛達教練高拉羅今季覓得強人幫手，現年43歲嘅迪漢諾夫雖然只係球隊二號教練，但呢位前國腳名氣更勝高拉羅，迪漢諾夫堪稱莫斯科斯巴達傳奇，球員時代曾經幫助該隊贏過8屆俄超冠軍，2011年為斯巴達最後一戰，更以40歲零337日高齡貢獻助攻，成為佳話。迪漢諾夫退役後出任斯巴達助教，今夏至轉投卡斯洛達，佢對斯巴達瞭如指掌，今仗可以為高拉羅提供破敵良方。
客軍射手迪斯奧巴弗爆

斯巴達聯賽開咧後兩連勝，新帥耶堅開個好頭，球隊史上9次對卡斯洛達贏咗8場，今晚乘勝追擊，就算作客都唔會保守，何況陣中仲有弗爆嘅迪斯奧巴，呢位俄羅斯射手上季遭受雙重打擊，既畀球會外借到羅斯托夫，又未能入選卡比路嘅世盃大軍，谷埋谷埋今季大爆發，重返斯巴達後兩場聯賽已轟入4球，而且過去分別為3支球隊同卡斯洛達對陣過8次，合共轟入咗6球，以佢目前狀態，有力繼續做「卡斯洛達尅星」。兩軍都會踢開放足球，今場入波又點會少？