BETTING GUIDE：阿仙奴乘機抽水

猪拉多纳

(六)56 阿仙奴 Vs 水晶宮

今季雄心勃勃嘅阿仙奴，今晚英超首輪主場迎戰水晶宮。阿仙奴雖仍有奧斯爾在內嘅「德國三寶」缺陣，但勇悍中堅哥斯尼趕及復出。相反水晶宮有料領隊佩尼斯臨陣劈炮，軍心大亂，「兵工廠」仲唔趁你病攞你命，力撐讓球主勝。

（now 621周日凌晨零時30分直播）

阿仙奴「德國三寶」奧斯爾、普多斯基及梅迪薩卡終於歸隊，但復操冇耐狀態未弗，況且嚟緊下周中仲有歐聯附加賽對比錫達斯，今仗應唔會冒險派佢哋上陣。好彩貴價新援阿歷斯山齊士逐漸融入，「藍神」艾朗藍斯未開咧已弗到漏油，連上周受傷嘅中堅哥斯尼都趕及復出，球隊人腳依然齊整。
佩尼斯開鑼前劈炮

水晶宮卻臨陣冇帥，有料領隊佩尼斯因為不滿高層增兵不力，想買嘅基菲爾施古臣、米捷同哥爾卡全部冇影，搞到佢嬲爆下尋日宣布辭職，今場由助教基夫米倫暫時領軍。上季正係中途接手嘅佩尼斯化腐朽為神奇，將垂死嘅水晶宮從包尾帶到上第11位，季尾仲當選英超最佳領隊。由於佩尼斯喺更衣室備受尊重，佢突然劈炮令眾將士氣低落，呢個時候作客剛奪社區盾弗到震嘅阿仙奴實等炒喇，讓球主勝乃不二之選。
韋斯咸熱刺大鬥法(六)22 韋斯咸 Vs 熱刺

英超首輪即上演倫敦打吡戰，韋斯咸主場對熱刺，「錘仔幫」銳意提升火力，今夏大破慳錦囊，以1,200萬鎊收購厄瓜多爾前鋒安拿華倫西亞，佢喺今屆世界盃有3球進帳，絕對唔嘢小，加上簽入曾効力拉素及國際米蘭嘅阿根廷前鋒莫路沙拉迪，的確令人有所期待。至於熱刺雖改由阿根廷少帥普捷天奴執教，但由於上季擴充太快，喺今夏轉會市場冇乜大動作，從好一方面睇，球隊變動少、夠默契，可迅速入局，加上打吡戰，雙方都要攞威，必搏盡，捧大盤為妙。

（now 621周六晚10時直播）
(六)2 浦和紅鑽 Vs 廣島三箭

呢場玩上盤抵過主W好多，主W1.8倍，讓平半有1.7倍，玩讓球盤和波只係輸一半，個盤真係抵到爛。至於點解揀浦和紅鑽，因佢哋近排頻頻喺聯賽失分，一定要搶分上番一哥位，而三箭係紅鑽私房菜，近五次對碰贏晒，有買趁手。

（有線61及201台周六下午5時直播）
(六)6 川崎前鋒 Vs 大阪櫻花

川崎前鋒射手大久保嘉人弗到爆，上仗射入致勝入球，依家以11球領先射手榜，佢首循環亦喺大阪櫻花身上取得入波，心理上佔盡優勢，加上櫻花隊長兼後防重心山口螢重創，川崎前鋒主勝出擊穩勝。

（有線64及203台周六晚6時直播）
(六)18 李斯特城 Vs 愛華頓

上季英冠一哥「狐狸」李斯特城升班後首戰將喺主場迎戰愛華頓，愛華頓今夏以破球會紀錄嘅2,800萬鎊（約3.6億港元）正式將借將盧卡古收歸旗下，計實力係愛華頓秤先，但「拖肥糖」狀態認真麻麻，踢咗六場季前熱身賽只贏一場，而「狐狸」亦唔想開咧戰就輸波打擊士氣，今場料會穩陣行先，博半場和！

（now 622周六晚10時直播）
(六)10 列斯聯 Vs 米杜士堡

名師果然出高徒，米杜士堡嘅西班牙主帥卡蘭卡曾喺皇馬做過莫連奴助手三年，深得「寸王」真傳，佢喺去年11月執教米堡，即令球隊成績大躍進，今夏更大手簽入多名攻擊球員，米堡今場作客陣容薄弱嘅列斯聯，唔使諗咁多喇，直取客勝啦！

（TVB301周六晚7時15分直播）
(六)20 史篤城 Vs 維拉

史篤城主場戰績一向甚惡，上季竟然贏咗10場咁多，今夏仲搵咗質素唔錯嘅保贊同馬美迪奧夫加盟，主場出擊信心十足。阿士東維拉兩大射手賓迪基同高薩克仲未好番，前線剩係靠安祖斯韋文攻堅點惡得出，今仗作客都係凶多吉少。

（now 624周六晚10時直播）
(六)52 巴黎聖日耳門 Vs 巴斯蒂亞

今晚法甲頭場上演「雙巴大戰」巴黎聖日耳門主場對巴斯蒂亞，巴黎聖日耳門前鋒伊巴謙莫域腳風順到不得了，連熱身賽在內近四場入咗八球。巴斯蒂亞今季由一代防中名將馬基列尼領軍下踢法絕不防守，上仗同馬賽激戰打和三比三，撞啱對手中堅堤亞高施華喺對拿玻里時受傷，今場入球唔會少。

（now 714、TVB302周六晚11時直播）
(六)19 昆士柏流浪 Vs 侯城

重返英超嘅昆士柏流浪（QPR）英超首騷將會對侯城，QPR主帥夏利列納今夏搵咗伊斯拿、佐敦梅治、哥爾卡同里奧費迪南等中後場猛人，擺明以穩陣行先。侯城嚟緊周中要踢歐霸盃附加賽，今仗作客相信都唔會全力出擊，呢場唔慌多波入，隨時係悶戰一場。

（now 623周六晚10時直播）
(六)57 燕豪芬 Vs NAC

燕豪芬上季聯賽做「阿四」，今季力圖重振雄風，新兵中以前鋒盧克迪莊最具卡士，配合荷蘭世盃腳迪比及約根盧卡地亞，呢個進攻鐵三角包辦開季至今三場正式比賽嘅七個入球。為留力下周歐霸附加賽，燕豪芬定必希望盡早解決對手，主場對NAC不妨敲半場主勝。

（now 670周日凌晨零時30分直播）
(六)70 皇家鹽湖城 Vs 西雅圖海灣者

美職西岸榜首大戰，皇家鹽湖城主場硬撼西雅圖海灣者，「阿二」鹽湖城依家只差榜首嘅海灣者兩分，今場為全取3分搶「第1」位置，唔會踢守勢波，而海灣者不嬲都係踢開進攻足球，好似上場美聯盃對芝加哥火燄，冇出王牌射手丹普西照炒6粒，今場有丹普西復出，大盤好路！

（TVB 301周日凌晨2時30分直播）
(六)21 西布朗 Vs 新特蘭

烏拉圭名將普耶上季中途臨危授命執教新特蘭，成功助球隊護級，顯盡領軍攻力，今季由佢親自組軍，簽入曼城防守中場魯迪維爾及門將彭迪利蒙，令球隊更加四平八穩。最重要係普耶今次有充足時間準備，預料新特蘭演出將更勝上季，作客西布朗有得受讓，捧讓球客勝。

（now 625周六晚10時直播）