修咸頓細報此仇

猪拉多纳

毋忘紅軍「肢解」之痛

真係天意弄人，今夏將修咸頓肢解，撬走人哋成條龍骨嘅利物浦咁啱就喺英超開咧戰對番「聖人」。可能大家會認為修咸頓半隊正選冇晒喎，利物浦今場主場仲唔係大炒格？不過人往往會喺最劣勢嗰陣強勢反彈，科娜唔敢睇小呢隊報仇心切嘅修咸頓，明知「紅軍」今場會攻，佢哋仲唔一心死守再博偷雞咩？因為喺晏菲路攞到分走落佢哋面，就係最佳嘅復仇手段，今仗預計唔會多波人，冷敲細盤好路。

（now 621周日晚8時30分直播）
僅洛夫雲可倒戈

利物浦今夏用賣蘇亞雷斯嘅資金買咗8件新兵，包括將修咸頓前中後成條脊骨列基林拔、拉爾拉拿同洛夫雲撬走，並引發列強合力將修咸頓「肢解」，最終「聖人」一共走咗8件主力，成隊波散晒咁滯。不過，由於拉爾拉拿因膝傷要到下個月先復出，而列基林拔就仲未同球隊融合，故紅軍今仗只有中堅洛夫雲一個可以正選倒戈。

另阿蘇去後，領隊羅渣士嘅構思就係將史杜列治同史達寧打造成新一代「SAS」，拍住中場發電機菲臘比古天奴組成攻擊三叉戟，上場熱身賽佢哋3個就發揮威力大炒德甲勁旅多蒙特4比0，睇落好似好堅，但嗰場多蒙特明顯留力德超盃鬥拜仁，所以參考價值唔高，呢場英超首輪至係紅軍嘅真正考驗。

利物浦近6季嘅開咧戰成績只係錄得2勝2和2負，其中兩場勝仗都只係僅贏1比0，包括上季主勝史篤城，紅軍嗰場攻勢雖然多，但就偏偏入得1粒咁大把，若非門將米洛列特喺臨完場救咗球12碼，「紅軍」早就失分。
開咧成績唔標青

始終開咧戰意義重大，球員隔咗一排再踢英超，心情難免緊張，對手亦唔想喺第一場就輸，所以「紅軍」以往開咧戰嘅成績一啲都唔標青，新一季佢哋又冇咗可以隻手扭轉戰局嘅「蘇神」，對手都冇咁驚啦？況且今場對手仲要係畀「紅軍」拆晒成條龍骨嘅修咸頓，球員都會加多二錢肉緊，希望守死「紅軍」落佢哋面，咁嘅形勢下戰況可能幾膠着，想睇入球騷嘅球迷可能要失望嘞！