耶耶「紐」計博續約 曼城首擊捧客W

猪拉多纳

上季盟主曼城今晚亦踏上衞冕征途，首擊將會作客紐卡素。「藍月亮」近日接連同阿古路等多名主力續約，卻賴低唔開心嘅耶耶托尼，主帥比歷連尼講到明續約一事要hold住先，今晚呢位科特迪瓦悍將撞正佢最鍾意食嘅「私房菜」紐卡素，勢必要show off證明自己值得獲得一張新約，客W值得捧場。

（now 621周日晚11時直播）

雖然曼城今夏冇乜重大收購，但先後同大衞施華、拿斯尼、高柏尼、阿古路等主力續約，積極留住冠軍班底，但中場核心耶耶托尼竟然冇份。自從上季季尾因生日冇人理，搞到差啲離隊後，耶耶與「藍月亮」關係大不如前，前者被指借「牛一」之事博加人工，主帥比歷連尼賽前強調暫時唔同佢傾續約住，堂堂上季聯賽銅靴兼奪標功臣，耶耶遭到如此冷待認真冇面，今仗作客紐卡素正係佢騷哥利嘅好時機。

曼城之前10次對住「喜鵲」未輸過之餘，更贏咗9場，擺明格食格，而耶耶喺近6次碰頭入咗4粒，「喜鵲」又有左閘大衞辛頓、箭頭柏比斯施斯受傷及守將杜密特停賽，耶耶仲唔喺比帥面前大顯身手博續約咩？客W有1.56倍乃穩陣之選，進取啲不妨揀埋2.62倍嘅讓球客勝。