紐記有排執益晒曼城

猪拉多纳

7件新兵亂咁砌

仲記得上季英超開鑼前，車路士係爭標大熱，事關「寸王」莫連奴重返史丹福橋，佢實牙實齒話會帶領車仔捧英超，至弊有氣勢冇實際，最後咪又係衰咗！曼城就唔同嘞，呢班波喺比歷連尼領軍後夠晒踏實，早排喺社區盾輸畀阿仙奴只係因為人腳唔齊啫，今晚喺英超對住紐卡素展開衞冕第一擊，贏波冇難度，「藍月亮」作客讓半一，捧1.84倍上盤。

「藍月亮」啱啱喺社區盾吞阿仙奴3蛋，可能唔少人都覺得佢哋表現走晒樣，但計Yennie話齋，「工程師」比歷連尼只係想隱藏實力啫，佢收起晒包括阿古路同高柏尼等主力，出埋保耶達嗰啲二打六，對住「夫添」出擊嘅阿仙奴，唔輸就有鬼啦！
林伯擔正阿古路候命

小妹依家身在英國，一早收晒風，知道以天價加盟嘅中堅文加拉今晚唔會落場，但王牌神箭阿古路就有望克服傷患披甲，加埋以借用身份來投嘅林柏特，拍住「非洲天王」耶耶托尼鎮守中場，人腳同「卡士」，點秤都贏紐卡素幾條街啦！睇埋往績，原來曼城近6次造訪「喜鵲」未輸過，總共錄得4勝2和，當中4場勝仗嘅贏波差距仲有兩球添！今鋪點會無啦啦甩拖呀？

仲有，上季以第10名衝線嘅紐卡素，今夏足足有7名生力軍加盟，成隊波好似新埋班咁款，尤其最有卡士嘅施安迪莊有傷在身，今晚仲未必落場。再講，「喜鵲」主場出擊不嬲冇乜把握，上季英超19戰只係贏得8場，今晚就算有地利，睇怕都係凶多吉少！
曼城對賽勝率達9成

雙方近10次交手，曼城贏足9次。

雙方近8次對賽，當中6次曼城均於半全場得勝。

曼城連續8場英超至少射入2球。
盤路解碼

曼城上季「-0.5/1」11勝2負