赫根回魂追殺希爾星堡

猪拉多纳

每逢周一都係二線波做主打，阿King今日睇中瑞典超赫根主場硬撼希爾星堡。聯賽三哥赫根擺脫早排嘅低潮，表現重上正軌，適逢希爾星堡作客唔掂，赫根食住個勢可望再贏多場，主勝咪錯過。

（周二凌晨1時05分開賽）

開季演出sharp醒嘅赫根，成季流流長總會有跌watt時候，尤其係前幾周接連賽和諾高平及輸畀艾夫斯堡，明顯眾將狀態處於調整期。好彩上仗作客咸史達斯及時起用奇兵拿斯魯穆罕默德，憑住呢位20歲新仔梅開二度，協助球隊大炒四個一皮走出谷底，拍住另一位90後殺手西蒙古斯達夫臣，赫根唔愁冇火力。

雖然希爾星堡上仗同樣大勝艾夫斯堡4比1，終止五連和嘅困局，但與對手莫碧克初段被逐不無關係，最重要係希軍作客例必腳軟，開咧至今佢哋客場贏得一仗咁大把，好難喺重拾信心嘅赫根身上攞到着數，梗係捧番主勝喇。
阿些斯奧打吡「客勝」有計

至於俄超泰歷克主場迎戰升班球隊摩度維亞，前者雖然實力高一班，但狀態仍未操起，摩度維亞勢必死守頑抗，初段隨時非常膠着，不妨博半場和。

最後法乙上演阿些斯奧打吡，由兩支同樣來自科西嘉島嘅GFCO阿些斯奧主場對阿些斯奧，不過GFCO喺上周中盃賽打足120分鐘先晉級，未有咁快回得切氣，以逸待勞嘅阿些斯奧仲有得受讓咁筍，讓球客勝捧得過。