德甲殺到拜仁「狼堡」做大騷

猪拉多纳

Fit爆羅拔仔孭飛唔愁冇波入

德甲返嚟喇！「阿占」祝大家今季睇好波之餘，都齊齊搵到啖食啦！今晚德甲由力求衞冕嘅拜仁迎戰禾夫斯堡打頭陣，主隊贏面當然高唱入雲啦，不過主W熱到冇肉食，反而玩入球大更實際！拜仁火力強唔使多講，問題係佢哋條防線都有漏洞，話唔定會畀「狼堡」偷到雞，入球大細中位數開到3.5球照捧1.95倍大！

（有線61、201及中央5台周六凌晨2:30直播）

德國上個月喺巴西贏咗世界盃，拜仁一班冠軍國腳要抖番夠本先歸隊，狀態肯定未係最Fit。好在佢哋勝在兵多將廣，新加盟又唔使踢世盃嘅羅拔利雲度夫斯基即刻入局，季前熱身賽已經成日「士哥」，再加上拜仁早前喺電訊盃決賽已經贏過禾夫斯堡3:0，要再撕破「狼堡」防線應該易如反掌。
拜仁防線唔齊腳禾夫斯堡實力大增

拜仁前線入波唔使擔心，不過佢哋後防就唔算好穩陣。西班牙防中查維馬天尼斯喺超級盃重創，未開咧就要長休，中場舒韋恩史迪加同右閘拿菲爾都因傷缺陣，加上拿姆、謝路美保定同紐亞等德國兵狀態未足，之前對美職明星隊同多蒙特都各失兩球，就連喺德國盃對住唔多人認識嘅普斯辛蒙斯達都要失波，條防線點令人放心？

禾夫斯堡今個暑假都買咗唔少人增強戰力，丹麥中鋒賓特拿將會係34歲老將奧歷嘅接班人，兩個都係能衝擅頂嘅前鋒，況且奧歷今場倒戈，點都騷下「哥利」啦！此外由不來梅加盟嘅肯特攻擊力都唔錯，加埋由馬體會來投嘅防中古拿禾古，有本錢同拜仁開入球騷，話晒「狼堡」上季德甲第5衝線，咪當佢豆腐呀！
頂占筍盤：拜仁（入球大）