平民馬體會唔驚皇馬

猪拉多纳

爛打唔錫身 地頭出戰打反擊

「平民兵團」繼續發惡！西甲向來畀皇家馬德里同巴塞隆拿壟斷，馬德里體育會上季異軍突起後今季慘遭拆骨。正當大家都睇死佢哋打回原形之際，偏偏「床單軍團」鬥心不死，喺西班牙超級盃首回合作客逼和皇馬1:1，次回合佢哋回師主場出戰竟然受讓平半，1.91倍下盤捧得過。

（now632台周六凌晨4:30直播）
C朗有傷上陣成疑

筆者唔夠膽話上季西甲盟主兼歐聯亞軍馬體會冇星味，但點計都比唔上西甲雙雄，不過成隊波勝在爛打唔錫身，想贏佢哋一啲都唔易。「床單軍團」今季失去韋拿、迪亞高哥斯達同泰拔高圖爾斯等球星，補入前鋒文迪蘇傑、門將莫亞等「平民」，點知首回合即令星光熠熠嘅「銀河艦隊」冇啖好食。依家佢哋揸住粒作客入球喺手，重返自己地頭踢番擅長嘅防反戰術，皇馬冇咁易咬得入囉！

況且主帥施蒙尼賽前亦出口術，大讚迪馬利亞上仗後備落場令球隊陷入苦戰。大家都知皇馬買咗卻奧斯同占士洛迪古斯，上季表現出色嘅「天使」焗住做犧牲品，就算老友C朗力撐睇怕都難留隊，需知皇馬內部山頭林立，一旦鬧不和得益嘅梗係馬體會。

皇馬想捧盃今場一定要入波先有價講，之但係首回合喺主場都係混戰靠執雞開紀錄，點畀到人信心先？仲要連王牌C朗都受埋傷上陣成疑，條後防線又唔穩陣，上仗就係角球大漏畀對方扳平，今場焗攻隨時死得仲快，睇怕「銀河艦隊」幾難中止連續3次贏唔到對手呢個不良紀錄。