BETTING BETTING：車仔超班大勝預埋李

猪拉多纳

(六)24 車路士 Vs 李斯特城

英超競爭激烈，有成五、六隊都有實力爭冠，不過車路士喺足智彩嘅英超冠軍賠率只得2.35倍，反而爭取衞冕嘅曼城有3.1倍；車仔能夠成為奪標大熱自然有原因，佢哋除咗有個神級教頭莫連奴之外，更重要係三線實力非常完整，上場作客般尼已經盡展霸氣，輕鬆反勝3比1，今晚仲要返到無敵主場，對戰另一支升班球隊李斯特城，讓球主客和車仔讓到兩球，照捧讓球主勝！

（now 621周六晚10時直播）
三大新兵踢到曉飛

車仔今夏買人貴精不貴多，一班新兵如迪亞高哥斯達、法比加斯，以及從馬體會回收門將泰拔高圖爾斯，個個都係猛人，上場對般尼佢哋都證明咗自己嘅身價，強力前鋒「迪哥」衝破車仔射手墳墓，上陣十七分鐘即取得英超處子士哥，組織型中場法比仔重返英超更係踢到曉飛，狂交靚波畀隊友輕鬆入波，新世代鋼門泰拔高圖爾斯能夠踢走施治做正選，就知佢有幾堅啦！莫連奴今夏成功打造完美戰車，今場要贏防守唔算強嘅李斯特城三球或以上難度唔算高，一於吼實讓球主勝。
(六)1 清水心跳 Vs 鹿島鹿角

清水心跳上周作客2比3輸畀仙台維加泰，但喺周三日皇盃主場2比1贏札幌岡薩多成功反彈，射手路華高域近況唔錯，加上剛簽入櫪木SC射手瀨沼優司，有望維持強大攻力。鹿島鹿角上周主場1比0小勝甲府風林，球隊重現強勢依然有爭奪聯賽冠軍嘅機會，由於鹿角喺日皇盃已經出局，因此有成個星期準備呢場波，加上球隊近期火力有所回升，今仗料會上演入球騷，捧大盤。

（有線64及203台周六下午5時直播）
(六)15 阿士東維拉 Vs 紐卡素

「喜鵲」紐卡素真悲哀，季初已經傷兵滿營，射手柏比斯施斯、中場迪奧迪、後衞大衞辛頓都有傷在身，加上首輪吞曼城兩蛋，更加雪上加霜。反觀阿士東維拉獲強援山齊士摩蘭奴加盟，呢位中場屬於哥倫比亞國家隊正選，協助哥軍打入今屆世盃八強，卡士十足，佢今仗將上演處子作，相信可令維拉「升呢」，平手盤必捧主場嘅阿士東維拉。

（now 621周六晚7時45分直播）
(六)27 史雲斯 Vs 般尼

「韓風」影響力唔止韓劇，足球亦一樣強勁，南韓國腳奇誠庸今季重返史雲斯，即大踢爭氣波，喺英超揭幕戰入波，協助「天鵝」擊敗曼聯。史雲斯有呢位靚仔中場孭飛，肯定吸納唔少亞洲球迷，現時氣勢旺盛，今晚主場對新升班嘅般尼，三分應該手到拿來，主勝可以睇高一線。

（now 622周六晚10時直播）
(六)26 修咸頓 Vs 西布朗

今夏畀列強「煎皮拆骨」嘅修咸頓，首仗作客利物浦力戰僅敗，表現唔係想像中咁曳，同務實主帥朗奴高文注重防守不無關係，但咁做難免影響前線進攻，今晚英超主場對同級對手西布朗，後者嘅90後前鋒比拉希奴日漸成熟，上仗對新特蘭更梅開二度堅弗，加上啱啱簽入希臘箭頭森馬拉斯，絕對唔怕攻力疲弱嘅修咸頓，仲有得受讓半一，梗係揀下盤喇。

（now 623周六晚10時直播）
(六)59 魯賓卡山 Vs 莫斯科中央陸軍

魯賓卡山係今季俄超和波王，開季四戰和三場，表現甚硬淨。莫斯科中央陸軍上仗打吡戰輸波兼輸人，右閘拿巴堅領紅牌被逐今輪要停賽，加上前鋒杜姆比亞仍有傷，戰鬥力勢必打折扣。魯賓卡山今季三次和波都係開「和和」，而莫斯科中央陸軍上次作客弱旅摩度維亞亦係靠下半場入波才擊敗對手，今場再追半場和。

（now 670周日凌晨零時直播）
(六)71 尼斯 Vs 波爾多

波爾多今季由前國腳沙洛擔任新主帥表現銳不可擋，上輪於先失一球下以4比1反勝上季亞軍摩納哥，球員愈踢愈有信心。尼斯開季兩場不敗表現亦唔錯，不過原來尼斯對上兩季聯賽四戰波爾多未嘗一勝，其中兩次主場出擊俱落敗。尼斯今場有兩大主力前鋒施維坦歷治及中場保迪馬因傷倦勤，波爾多讓平半照捧上盤。

（TVB 302周日凌晨2時直播）
(六)88 紐約紅牛 Vs 蒙特利爾衝擊

美職常規賽淨番大約十場就完，多支球隊為爭取季後賽資格全力拚搏，當中包括擁有一對星級箭頭亨利同巴利胡禮菲臘斯嘅紐約紅牛；紅牛依家喺東岸排緊第五位，僅僅領先第六位嘅費城聯一分，今場紅牛喺主場迎戰東岸榜尾嘅蒙特利爾衝擊，係拉開分數、保住季後賽資格嘅好時機，紅牛今場冇得手軟，捧讓球主勝啦！

（TVB 301周日早上7時直播）
(六)25 水晶宮 Vs 韋斯咸

今晚英超水晶宮主場硬撼韋斯咸，大家都內憂不斷，前者仍未搵到新帥，繼續由助教基夫米倫暫時領軍，上仗領紅嘅前鋒賓捷安要坐波監，中堅史葛丹恩又上陣成疑，另一邊廂韋斯咸唔單止有安祖卡路爾、馬菲查維斯、湯堅斯、贊堅臣等十字兵，守將占士哥連斯亦要停賽，兩軍都屬傳統高Q大棍球隊，大踢簡單足球下空中混戰居多，應該會產生好多角球。

（now 624周六晚10時直播）