撐曼聯客W開齋

猪拉多纳

開咧戰輸波 搵黑貓洩憤

英超開鑼戰輸波嘅曼聯今晚作客新特蘭，射手尹佩斯終於歸隊，有佢拍住狀態不俗嘅朗尼，攻力提升勁多。被寸為「新莫耶斯」嘅尹戈爾今仗絕對不容再失，形同生死戰，必使出渾身解數爭勝。新特蘭主場光明球場一向係曼聯福地，「黑貓」毫無地利優勢可言，加上防線兩位紅魔舊將布朗、奧沙年事已高，遇上母會曼聯隨時送禮報恩，簡單揀客W。

（now621周日晚11時直播）
盧祖未出得 靠晒尹佩斯

曼聯首輪落筆打三更，主場輸畀史雲斯，好大程度上因為冇運，例如翼鋒連格喺上半場傷出，打亂尹帥嘅部署，朗尼罰球又射中柱，真係相當黑仔。今場紅魔雖然有新兵安達靴里拉因傷缺陣，但有尹佩斯放完世盃假期，日前已復操，表明準備好今仗搏殺，有呢位荷蘭國腳幫手，朗尼就唔使好似上仗孤軍作戰咁辛苦。事實上，尹佩斯最清楚尹戈爾嘅進攻戰術，由佢執行指令，必有利曼聯整體發揮，入波唔成問題。

至於另一新兵馬高斯盧祖仍未獲英國勞工部門簽發工作證，今場未趕得切上陣，但呢位24歲阿根廷國腳嘅來投，已令到隊中另外兩位中堅菲爾鍾斯及基斯史摩寧充滿危機感，為保正選位置，今場冇得再犯錯，必會更加醒定。
布朗奧沙老化 防線唔掂

「黑貓」新特蘭上季勉強護級成功，但領隊普耶仍未解決防守脆弱嘅弊病，上仗領先下連失兩球，最終逼和西布朗2比2。「黑貓」防線老化問題嚴重，布朗、奧沙分別已經34及33歲，應付體力化嘅英超比賽非常輸蝕，尤其係對手朗尼、尹佩斯、桑馬達都係世界級進攻高手，睇怕呢兩位舊紅魔今次勢必成為新特蘭防線上嘅計時炸彈。另新特蘭近11次聯賽主場對曼聯，竟然輸9次，紅魔鬼上季由莫耶斯領軍，作客光明球場都可以全取3分，更何況由尹戈爾執教，冇理由再衰，紅魔客W值得支持。