紅軍作客戥人威

猪拉多纳

冇蘇神又冇巴神 點夠曼城鍊？

英超次輪賽事話咁快就上演上季英超冠亞軍對對戰，由曼城主場對利物浦，呢場波本身已經好矚目，點知大戰前夕突然傳出曼城舊將巴洛迪利會由AC米蘭過檔紅軍，就更加令人期待呢場大戰！不過要令各位球迷失望嘅係，「巴神」今場只能做住觀眾，未能上陣倒戈。紅軍冇咗神級前鋒蘇亞雷斯、巴洛迪利又唔出得，作客對住近乎毫無弱點嘅曼城，今仗都係戥人威居多，科娜熱捧1.66倍主勝！

（now 621周二凌晨3時直播）
新SAS火力有限

利物浦喺賣咗蘇亞雷斯之後，買入嘅幾個新兵如拉爾拉拿、列基林拔等，無論位置抑或能力都唔係用嚟頂替阿蘇呢位上季英超神射手，就喺轉會窗快將關閉之際，領隊羅渣士終於出手購入「巴神」，製造勁爆新聞。雖然「巴神」係天才前鋒，有射術但冇紀律，點解羅帥要找自己麻煩簽件癲癲喪喪嘅人返嚟呢？其實咪就係因為冇咗阿蘇嘅紅軍，攻力唔止跌咗一個「呢」，好似上場開咧戰，有威脅嘅攻門仲少過「被拆骨」嘅修咸頓，如果唔係「聖人」把握力差，紅軍全失3分一啲都唔奇，見到咁嘅情況，羅渣士惟有買腦殘博一鋪。

紅軍今場未可派「巴神」出戰，雖然兩位新兵拿沙馬高域、艾拔圖摩蘭奴可隨時候命，但呢場係對上季冠軍曼城嘅大戰，相信羅帥為穩陣起見都會出番上場嘅原班人馬，靠新「SAS」史杜列治同史達寧喺前線孭飛，但呢個組合火力有限，同曼城砌真係仲未夠卡士。
比帥執掂防線弱點

暴發戶曼城經過多年嘅瘋狂買人賣人後，主力班底已成形，阿古路、大衞施華、耶耶托尼、拿斯尼等人夾慣夾熟，今夏更買入波圖防守雙星費蘭度法蘭斯高同文加拉，解決防守脆弱問題，再加上領隊比歷連尼嘅帶隊功力遠超前任嘅文仙尼，佢勝在夠踏實，令到曼城連不穩定呢個弱點都冇埋。

「藍月亮」唔單止實力高過紅軍，連經驗都勝一籌，紅軍一班「o靚仔」有時踢得太過急進，曼城就可以睇定嚟踢，搵機會一劍封喉，主場出戰勝算甚高，主勝雖然熱咗少少，但勝在穩陣