君子一言買定先

不死鸟

近兩次沙田日賽，K346「軍士」及K348「賞蝦王」先後出場，惟首戰表現均屬一般，事後解釋來港日子唔長，適應未算好，今次輪到同機到埗、一對新自購馬K345「君子一言」和K347「歡呼星」粉墨登場，基於季尾大部份馬已拚殘，對這類新勢力仍不可掉以輕心。尤其「君子一言」對一些有識之士更是期待已久，這匹馬今年一月響澳洲費明頓兩戰兩勝，路程1400米，初出跳上讓磅賽贏馬唔奇，最犀利係次仗可以響三級賽輕勝三個幾馬位，能力高深莫測，評94分肯定有賺冇蝕，方嘉柏想反噬大摩，呢類新勢力隨時可左右大局，買定先都無錯。
講來頭，賀賢的「歡呼星」拍馬都追唔上方廐「君子一言」，但匹馬響澳洲跑三場得一冠兩亞，而且每跑一場都有進步，來港後應有不少升值潛力，問題係來港前一直有戴眼罩上陣，未裝配備前戰意甚難測，惟早前對同類想法的「締造美麗」走漏了眼，所以都不敢太過批死。