紅魔哀兵大反彈

猪拉多纳

尹戈爾落柯打 盃仔「米」手軟

曼聯喺後莫耶斯時代繼續沉淪，開季頭兩場對住英超中下游球隊史雲斯同新特蘭都贏唔到，全球反曼球迷個個都high爆，盡情恥笑落難紅魔。不過，科娜認為尹戈爾嘅帶隊功力遠超「足球天才」莫耶斯，加上強援「天使」迪馬利亞將至，前景唔使太悲觀。紅魔依家只需要一啲時間嚟重整球隊。今場英聯盃次圈作客英甲嘅米爾頓凱恩斯，正正係畀「紅魔鬼」一個反彈機會，猛攻對方力求重振聲威，贏波之餘更要大勝一場，今場大盤唔好錯過呀！

（TVB 301周三凌晨3時直播）
天使未趕到一樣夠殺

曼聯已經足足有19年冇踢過英聯盃次圈賽事，今季要由次圈打起，全靠「莫天才」所賜，不過，即使英聯盃嘅分量好細，米爾頓凱恩斯有幾廢，曼聯今場都唔會留手，呢支紅魔季前係威係勢，喺熱身賽試過大炒洛杉磯銀河7蛋，更接連擊敗皇家馬德里同利物浦，以為「紅魔鬼」今季可以大翻身，重返勁旅行列，點知一踢英超就打回原形，開季兩戰1和1負失咗5分，爭霸已經輸在起跑線。

不過，以曼聯現時嘅班底，即使兩名阿根廷新援馬高斯盧祖同迪馬利亞，一個仲搞緊工作證，另一個尚未正式加盟，但仍然係勁旅級數，而依家曼聯最需要嘅就係一場大勝，盡快重建信心，今場難得對住低幾班嘅米爾頓凱恩斯，領隊尹戈爾應會照排強陣，並落柯打叫球員即使踢盃仔都唔好手軟，並要全力主攻，務求大炒對方，提升魔性。
米爾頓凱恩斯冇得揮

相信大家都唔知米爾頓凱恩斯呢隊波，可能個隊名聽都未聽過，不過如果話呢隊波嘅前身係溫布頓，資深嘅球迷就會「哦」一聲，然後啲回憶返晒嚟，溫布頓曾經踢過英超同喺1988年攞過英足盃冠軍，其後搬咗去新市鎮米爾頓凱恩斯後先至改名。呢隊波長期喺英甲浮浮沉沉，有幾多料唔使我講大家都估到，今場又有主力後衞賀特臣因傷缺陣，防線大穿窿，朗尼、尹佩斯同桑馬達等進攻能手仲唔大開殺戒，大盤捧得過。