米禾爾越級頂住修咸頓

猪拉多纳

同晚聯賽盃另一戰由英冠米禾爾主場挑戰「聖人」修咸頓，修咸頓今季喺轉會市場動作多多，不過並唔係瘋狂買人而備受注目，而係畀其他球隊「瘋狂肢解」，極度慘情，搞到英超開季兩戰1和1負，所以對住低一個級別嘅米禾爾都難言穩勝，皆因米禾爾實力唔曳，且防守力強，今場主場受讓值捧，讓球主勝值得一博。

（TVB 302周三凌晨2時45分直播）

修咸頓今夏畀利物浦拆骨得最勁，適逢英超開咧戰就對住呢隊仇家，喺踢得唔差嘅情況下都要輸波，皆因球員把握力奇差，幾次大好機會都白白浪費，跟住上場返到主場鬥西布朗，攻門亦係寥寥可數，最尾悶和0比0，明顯睇到「聖人」攻力唔多掂，冇咗進攻兩大主力拉爾拉拿同列基林拔對佢哋嚟講真係好大影響，而加斯安奴柏利、禾特普斯同杜辛泰迪治呢個全新進攻組合又未磨合得好，今場作客實難睇好。
主場死守好難咬得入

米禾爾今年1月改由前水晶宮領隊荷路維執教，呢位光頭主帥成功以防守理念助球隊喺上季護級成功，悶得嚟夠實際，總之奉行「贏唔到都唔好輸」政策。新球季米禾爾繼續得個守字，開季頭兩場對住列斯聯同富咸都冇失波，然後再把握對手失誤，小勝一至兩球，咁強嘅防守，「聖人」未必咬得入佢哋？分分鐘一個唔小心被咬番轉頭添！