尼科西亞技勝阿爾堡

猪拉多纳

歐聯附加賽首回合入波數字低，10場有8場開細盤，屬於意料之中，畢竟首回合交鋒，雙方多數先作試探，來到次回合先至真正埋牙。今晚5場比賽，可留意尼科西亞主場對阿爾堡，塞浦路斯球隊尼科西亞近年引入多位巴西及葡萄牙球員，技術含量高，獲得莊家們重視，普遍開緊尼軍讓半一，上盤值得信賴。

（有線63台周三凌晨2時45分直播）

兩隊首回合打和1比1，尼科西亞有1粒作客入球手，換言之悶和0比0都可以晉級。不過，尼科西亞崇尚南美進攻踢法，相信唔會因為有優勢而採用保守戰術。事實上，尼科西亞能夠稱霸塞國聯賽進軍歐聯，就係因為引入巴西、葡萄牙、西班牙、阿根廷外援，首回合為球隊攻入扳平一球嘅雲尼斯奧斯正係巴西兵。丹麥球隊阿爾堡為求收復失地，應該會壓前，到時尼軍一班好波之人，會有更多發揮空間。
些路迪馬里博爾實駁火

另外，蘇超褪色豪門些路迪首回合表現進取，比賽初段已打開紀錄，贏唔到波皆因防守曳，返回主場鬥馬里博爾，應會更搶韁，爭取贏波向球迷交代。馬里博爾攻力亦唔錯，呢場最好博大盤。另一隊葡超球隊波圖領先一球，返回主場對法甲里爾，求勝意慾唔會高，讓半一太過火，寧捧下盤。