法聯盃查多魯再掃克

猪拉多纳

今日受注賽事以盃賽做主打，阿King重心放在法聯盃第2圈全法乙對碰，查多魯主場對克萊蒙特身上。克萊蒙特今季兩場作客俱落敗，包括月中於聯賽不敵今場對手查多魯，今次再喺同一場地碰頭，一於信主隊查多魯可以再下一城，捧主W。

（周三凌晨2時開賽）
GFCO作客唔赦格迪爾

克萊蒙特除咗開季兩場作客輸晒，上周末主場出擊喺一度領先2比0下，最終竟被升班馬GFCO阿些斯奧反勝4比3，料對士氣有一定打擊。相反查多魯自從擊敗克萊蒙特取得聯賽首捷後，成績穩步上揚，上輪作客勁旅昂熱都能保持不敗全身而退，一對箭頭組合查美迪及佳哥利菲爾頻頻有士哥，有望繼聯賽後再喺主場殺敗對手。

剛才提過嘅GFCO阿些斯奧則會作客出戰同級隊伍格迪爾，GFCO阿些斯奧上圈作客憑互射12碼淘汰比斯特，今季3場作客未輸過。格迪爾陣中雖有名牌前鋒比基安尼壓陣，不過上圈面對丙組仔CA巴斯蒂亞都要踢至加時至淘汰對手，該場比賽比基安尼都有份正選上陣，似乎單天難保至尊，捧讓球客勝。

最後串埋中冠盃第3組分組賽，美職代表紐約紅牛主場對薩爾瓦多球隊ＣＤ法斯，同組仲有另一美職勁旅蒙特利爾衝擊，衝擊現時兩戰全勝得6分排榜首，由於每組只有首名可以出線8強，未有分數嘅紐約紅牛迎戰兩戰全敗嘅ＣＤ法斯自然不容有失，捧讓球主勝。