里爾唔識攻波圖入球細明醒里

猪拉多纳

波圖喺歐聯附加賽首回合作客以1:0小勝里爾，今晚返到主場，揸住作客入球大可以睇定嚟踢。里爾上一仗喺主場都冇乜威脅攻勢，次回合去到人哋地頭都幾難有作為。一隊踢「擦鞋仔波」，一隊唔識攻，與其估邊隊贏，不如捧1.62倍嘅入球細好過！

（有線61台、201台周三凌晨2:45直播）
有作客入球唔搶攻

波圖上場對住里爾有明顯優勢，但係埋門把握力欠奉，所以先淨係贏得1球。不過，呢個作客入球令到佢哋有好大優勢。睇番上季葡超，波圖可以得到聯賽季軍，主要都係因為佢哋主場極度硬淨，15場主場只係失咗6球咁大把，強如賓菲加同士砵亭都要鎩羽而歸。里爾首回合都撕破唔到波圖嘅防線，次回合想入多兩球都難。

里爾上場唔係冇攻勢，不過比利時國腳奧歷治冇乜供應，所以難有作為，而後防哥捷亞後上浪費唔少機會，真係正牌「敗家仔」。佢哋次回合喺陣容上應該唔會有大變，睇唔出有咩板斧可以攻破波圖大門，而對手今場睇定嚟食，又有前鋒基斯甸泰路養傷，由老將哥利斯馬頂替，肯定唔會貿貿然壓前，所以呢場撐「入球細」就最着數啦！