廠仔智擒 比錫達斯

猪拉多纳

個個嘜實丹巴巴亞

今晚歐聯附加賽次回合，大家可能最關心阿仙奴死唔死得。不過兵工廠係近年歐聯附加賽之王，近13場贏足12場，今晚返主場對比錫達斯，贏面梗係高啦，即使射手基奧特傷埋或要抖3個月，但只要專心嘜死對方王牌丹巴巴亞，比錫達斯又有乜好驚喎，捧1.9倍「讓主」啦！

（有線61及201周四凌晨2:45直播）

首回合踢成0:0，阿仙奴喺社區盾以3:0大勝曼城，以為好醒啦，點知跟手喺英超同歐聯都唔係好撻得着，日前作客以2:2逼和愛華頓，確係執番1分，弊在有份入波嘅射手基奧特啱啱受傷，足踝骨折可能要抖3個月。加上領隊雲格口硬話唔買新前鋒，普多斯基又被打入冷宮，同時新隊長阿迪達重傷，中場艾朗藍斯停賽，士氣難免受到沉重打擊。
阿仙奴基奧特足踝骨折抖3個月

好彩廠仔仲有前鋒新仔耶耶辛洛高，佢曾經喺酋長盃對賓菲加，連入4球好巴閉，今場剛啱好番上陣隨時做英雄，事實上領隊雲格一直睇好佢可以孭起兵工廠前鋒線。況且阿仙奴不嬲係歐聯附加賽之王，近13場波贏足12場，近年喺歐聯外圍賽都例必過關，有咁強數據支持落到場都信心大啲啦！
比錫達斯教頭熟英超波

對家比錫達斯由比歷執教，佢帶過克羅地亞國家隊，球員時代又長時間喺英超搵食，肯定好熟阿仙奴嘅戰術，首回合打和0:0證明佢係有啲計。雖然比錫達斯今季簽入車路士射手丹巴巴亞，喺首回合搞到阿仙奴後防倒瀉籮蟹，但我相信兵工廠有過上次教訓，一定會諗定計仔對付佢，只要搞得掂佢，比錫達斯仲有乜本事同兵工廠撼呀，作客倫敦真係唔多樂觀囉！
盤路解碼

阿仙奴上屆歐聯6次「-1」4次贏盤
Data King：阿仙奴旺開角球細

‧阿仙奴近13次出戰歐聯附加賽有12勝1和。

‧兵工廠連盃賽近5場得1次領先，其餘2次打和、2次落後。

‧阿仙奴近4場有3次開角球細。

‧比錫達斯連續3場開半場細。
乜都玩錦囊：廠仔後防曳易先失波

假如大家決定捱眼瞓睇波，不妨試吓玩比錫達斯3.85倍「第一隊入球」，博佢哋先開紀錄，因為阿仙奴近3場已經有2次先落後，水晶宮同愛華頓都可以領先佢哋，證明兵工廠後防表現的確好曳，一個唔覺意畀比錫達斯先入波，真係唔出奇喎！