多蒙特上盤執到

猪拉多纳

反彈之王！列奧斯回勇！

「德甲星期五」有好波睇，奧格斯堡喺主場對多蒙特，奧堡好難搶到分。雖然多蒙特喺開咧戰慘敗，傷兵問題又嚴重，不過教練高普證實門將維丹費拿會復出把關，而且多蒙特上季只係試過一次連敗，一輸完波後例牌即時反彈，況且佢哋有咁多大炮喺手，使驚W唔出？多蒙特讓半一，捧1.84倍上盤！

（有線61及201周六凌晨2:30直播）

上星期多蒙特喺開咧戰淨吞利華古遜兩蛋，教練高普冇大發雷霆，因為佢知班波傷兵滿營，特別係新隊長曉姆斯、守將基治同舒姆沙都唔踢得，搞到防線唔多穩陣。只不過，賽前高普證實正選門將維丹賀拿已傷愈，有佢睇實個後防，相信多蒙特嘅中前場球員可以更安心爭取入球。
周中熱身賽列奧斯有波入

再講，高普周中特別安排熱身賽谷起球員狀態，日前多蒙特以4:0輕取曼希恩，王牌馬高列奧斯都有波入，消息仲話，佢好番後已再次成為歐洲轉會市場紅人，甚至有報道話皇馬已經傾掂下季撬佢過檔，但無論點，相信佢都會繼續爭取表現，至少真係轉會嘅時候，都有牙力嗌高啲人工嘛！

除咗馬高列奧斯，多蒙特前線仲有好多攻擊武器，中場米希達利恩同射手奧巴美揚就分別喺德國超級盃入波，協助多蒙特以兩球解決拜仁慕尼黑，加上新簽入嘅拖連奴射手恩莫比尼同哈化柏林前鋒阿祖安拉莫斯要爭位踢，好難相信多蒙特會再次食白果，而且翻查數據，上季多蒙特每次喺聯賽輸完波之後，只係11月嗰陣連敗2場，其餘賽事又可以即時反彈，要開W應該唔難。
奧格斯堡2連敗兼食白果

奧格斯堡上周作客以0:2不敵賀芬咸，計埋德國盃開季2連敗兼冇波入，而且新球員當中，只得燕豪芬前鋒馬達夫斯見得人，至於留隊嘅前鋒哈利艾天托普，之前連德乙都踢唔掂，如果奧堡諗住靠佢食胡，真係要祝佢哋好運喇，唔好忘記，對上兩季奧格斯堡主場對多蒙特，每場至少失3球輸波呀！
Data King：兩軍對賽蜜蜂「大」晒

‧兩軍連續4次對賽開入球大。

‧奧格斯堡開季後連盃賽2連敗兼冇波入。

‧多蒙特近2次作客奧格斯堡至少淨勝2球。

‧多蒙特開季後連續3場開半場入球細。
乜都玩錦囊：玩埋多蒙特第一隊入球

多蒙特近6次對奧格斯堡有4勝2和，贏面好大，期間佢哋更加有5次先開紀錄，假如大家覺得90分鐘完咗先收錢唔夠過癮，不妨強捧多蒙特1.45倍「第一隊入球」，畢竟佢哋有正選門將維丹費拿復出把關，防線可靠，要先開紀錄好易啫。
盤路解碼

上季多蒙特7次讓半一，有3次贏盤。