利華新帥狠開波即搶拿拿林

猪拉多纳

德甲早場直播仲有利華古遜主場對哈化柏林，利華喺新帥羅渣舒密特領軍下開波即瘋狂搶攻，今晚主場面對擅打反擊嘅哈化柏林唔會改變踢法，半場大有2.19倍好分頭值得再追。

（有線61及201台周六晚9時30分直播）

利華今季換帥增兵，查漢奴古同外借回收嘅比拿拉比狀態大勇，搞到上季以17個入球成為德甲3號神射手嘅新兵祖斯比迪米斯都只能做後備，前線人才濟濟。羅渣舒密特仲將佢喺奧甲薩爾斯堡嘅撒手鐧帶埋嚟利華，開咧至今場場開波即搶，德國盃首圈作客對瓦爾達爾格斯海姆，傑斯寧兩分鐘就打開紀錄，佢一個人上半場已經入咗4球（全場共入5球）；跟手歐聯對哥本哈根傑斯寧又5分鐘即入波，半場已同對手踢成3比2；然後德甲首輪作客多蒙特，比拿拉比開波9秒入波更打破德甲52年來最快入球紀錄；啱啱周中歐聯再戰哥本哈根，球隊喺開波短短6分鐘已經領先兩粒，開波即搶作風頻頻得手，今場當然唔畀佢停。
哈化柏林反擊快

哈化柏林聯賽首戰2:2賽和雲達不來梅，但前線新兵同反擊踢法都有亮點，由多蒙特加盟嘅箭頭舒希巴首度上陣即梅開二度；另兩名新兵荷蘭翼鋒比倫斯同日本小將原口元氣令球隊反擊速度大幅提升，呢支首都球會上季喺教練盧爾侯卡帶領下專心打反擊，作客表現仲叻過主場，今晚同利華鬥搶，半場好易拿拿臨開出大盤。