出齊幾支大炮 阿仙奴圍城獵狐

猪拉多纳

周中喺歐聯附加賽驚險晉級嘅阿仙奴，今晚11點又要再上征途作客李斯特城，唔少球迷近期頻頻高呼「雲格買前鋒」，頂替重傷抖5個月嘅基奧特，但查實「兵工廠」前線有好多大炮可以用，除咗王牌前鋒阿歷斯山齊士，普多斯基、祖爾甘保同耶耶辛洛高都要搏表現爭做正選，今場對住「狐狸」李斯特城，可望開出1.66倍客勝。

（now621台周日晚11:00直播）

法國中鋒基奧特受傷前畀人鬧爆，但佢重傷後，班球迷又改晒口風話阿仙奴冇佢唔掂，好在雲格心中有數，周中歐聯對比錫達斯用智利國腳A山擔正踢正箭頭，表現唔錯，佢仲射入加盟之後首個士哥添，睇見A山滿場飛，證明佢狀態好好，而且歐聯停賽嘅艾朗藍斯今晚可以復出，戰鬥力即時大幅升呢。
3件前鋒爭正選實搏

唔好忘記，普多斯基、祖爾甘保同耶耶辛洛高3個前鋒，上場坐晒喺後備席都冇落場，佢哋要爭正選肯定戰意十足，廣受球迷愛戴嘅祖爾甘保，前日仲喺U21聯賽上陣表現出色添，今晚好有機會披甲。同時，防線新星哥林張伯斯又啱啱入選英格蘭國家隊，信心肯定加強，阿仙奴依家個勢唔錯，翁文成信佢哋可以拎到3分。
狐狸新兵甘比亞素難適應英超

李斯特城賽前簽入阿根廷球星甘比亞素，不過呢位前國米球員已經34歲，幫到隊波幾多，真係好難講，至少踢咗意甲10年嘅佢，好難喺今仗即刻適應英超嘅節奏囉。查實李斯特城上場聯賽輸畀車路士後，周中聯賽盃仲畀梳士貝利踢埋出局，班球員嘅狀態根本都唔夠，今晚主場出擊，都好難擋住阿仙奴大炮！
（日）32 23:00 李斯特城 Vs 阿仙奴