三箭唔齊腳濕滯 紅鑽夫添搶頭胡

猪拉多纳

當大家注意力集中喺國際熱身賽時，千祈唔好忘記今午有四場日聯盃8強首回合，其中廣島三箭於主場火併聯賽一哥浦和紅鑽。三箭不但傷兵滿營，撞正國際賽期仲有水本裕貴被國家隊徵召，相反紅鑽夫添出擊，可望首回合先拔頭籌，小讓平半捧得過。

（周三晚6時開賽）

雖然傷咗一排嘅廣島三箭王牌佐藤壽人有機會於今仗復出，但佢哋實在太多傷兵，包括前鋒石原直樹、淺野拓磨、隊長青山敏弘及黃錫鎬，全部都仲養緊傷唔出得，最弊係守將水本裕貴被日本隊徵召入伍，出戰嚟緊對烏拉圭及委內瑞拉嘅熱身賽，真係前中後三線都缺人，認真濕滯。

對手聯賽一哥浦和紅鑽氣勢如虹，近兩仗轟八粒火力堅勁，最恐怖之處係佢哋攻擊點分得好散，梅崎司、興梠慎三、李忠成、槙野智章個個都識入波，佢哋亦冇乜受國際賽影響，可以夫添應戰。加上紅鑽近六次同三箭正面交鋒，竟然取得全勝佳績，擺明係格食格喇，既然陣容完整及有往績支持，紅鑽就算作客讓波都冇有怕，小讓平半有1.87倍，呢個上盤有買趁早。
櫻花殘陣難擋前鋒

同時間嘅另一場日聯盃8強戰，大阪櫻花主場硬撼川崎前鋒，前者雖有中場金聖堎刑滿復出，但隊長山口螢、秋山大地及藤本康太仍倦勤，其中冇咗中場核心山口螢影響大，相反川崎前鋒冇乜傷兵之餘，仲有登里享平坐完波監可候命，近五次對碰未嘗一敗，小讓平半不妨一試。