捷克Hea戰美國歎細界

猪拉多纳

今晚熱身賽做主打，仍處於重建階段嘅捷克坐鎮主場迎戰美國。由於捷克依然青黃不接，況且下周中要於歐國盃外圍賽大戰荷蘭，相信喺呢類拍跳場合會避重就輕；美國亦召入多名新丁試陣味濃，今仗唔慌多波入，細盤值得捧場。

（now 634及660周四凌晨2時15分直播）

自從由尼維特、普波斯基、真高拿組合嘅「黃金一代」引退後，捷克真係王小二拜年，一年不如一年；記得早兩年歐國盃有個「捷克美斯」華拉夫比拿上位，佢喺左路快速突破非常銳利，被喻為「新黃金一代」嘅領軍人物，可惜近兩年佢飽受傷患困擾，無論喺禾夫斯堡定弗賴堡都未如人意，今季更被借番去捷克嘅柏辛域陀尼亞。其實華拉夫比拿正係捷克足球青黃不接嘅寫照，好多新人質素唔算曳，不過際遇認真麻麻，以致施治、路斯基等老將仍要支撐大局。

捷克今次只召入馬迪維達及拿菲達兩名箭頭，前者只係効力英冠仔屈福特；拿菲達已經三十有二，當一眾球員只於歐洲低水平聯賽搵食，質素好難期望大幅提升。加上佢哋下周中要出戰更重要嘅歐國盃外圍賽主場硬撼世盃季軍荷蘭，捷克今仗只視作練兵hea踢。美國雖有愛華頓門將侯活宣布暫別國家隊一年，但主帥奇連士文繼續改革徵召多名新丁，包括剛被多蒙特提升至一隊嘅吉奧，試陣味濃，揀入球細啱數。
俄羅斯省招牌捧「讓主」

另一場較早時間開波有俄羅斯主場對住阿塞拜疆，前者喺世盃表現劣評如潮，名帥卡比路嘅保守打法畀人鬧爆，今場佢特登選咗新季喺俄超攻入六球嘅前鋒迪斯奧巴，呢位時隔三年後再獲徵召嘅射手一定搏甩髀，弱旅阿塞拜疆好難頂得住，直取讓球主勝。

（now 634及660周三晚11時直播）