櫻花前鋒 細均力敵

猪拉多纳

大阪櫻花、川崎前鋒兩支攻擊型球隊，今日响日聯盃8強首回合交鋒，理論上入球大係必揀嘅投X首選，但係主場出戰嘅櫻花有半隊唔踢得，主帥柏薩奧里又就嚟冇得撈，可能會打穩陣波，2倍入球細值得扒冷。

（開賽時間：周六晚6:00）
櫻花半隊唔踢得

櫻花呢排認真濕滯，6月先上任嘅監督柏薩奧里帶隊未夠3個月，9場聯賽得4和5負，盛傳好快就炒魷，令櫻花可能自04年以嚟，第一次喺季內兩換主帥。唔只咁，呢期佢哋傷兵特別多，中場山口螢、長谷川阿里亞、守衞藤本康太、安藤淳都唔掂，染谷悠太亦病咗兩日冇操到，加埋中場扇原貴宏、龍門金鎮鉉分別跟咗日本、南韓國家隊集訓，成半隊人冇咗。

雖然係咁，櫻花個班底仲係比較厚嘅，前面有科蘭同新加盟嘅卡卡奧唔在講，今季打起嘅南野拓實、吉野峻光都有啲料到，今日對住full Team嘅川崎，完全唔會冇得打，否則足智彩個主客和水位唔會咁平均，主隊只係稍為冷些少，證明櫻花受讓未必博唔過。

不過，大家仲要留意多一點，就係個入球大有1.72倍，比想像中好分咗少少，要知道櫻花以往11次主場撼川崎，有8次開入球大，咁都有1.72倍回報實在太筍。而且川崎呢排表現其實麻麻，已經3場不勝，鋒線表現回落，未必可以陪櫻花開入球騷，2倍嘅入球細抵博o架。