新大佬朗尼跌Watt 三獅新軍難攞頭威

猪拉多纳

新紮「三獅」再上路！喺今夏世盃分組賽取得3戰不勝羞家紀錄出局嘅英格蘭，今晚主場同挪威拍跳，同時係朗尼升任隊長後第一擊。不過連英迷都唔畀面撐場，加上佢哋踏入「重建期」未必咁易砌低對手，一於揀2.88倍讓球客勝。

（now621台周四凌晨3:00直播）

世盃過後，「三獅軍團」兩大精神領袖林柏特、謝拉特宣布退出國家隊，昔日黃金一代正式退隱，球隊亦進入重建階段。睇番今次英軍名單，得新隊長朗尼多過50頂喼帽，新兵中場哥爾碧克、守將哥林張伯斯等4人一啲國際賽經驗都冇，前者直頭踢得1場U20比賽就跳級做大國腳，咁點搞先！
新兵國際賽經驗淺前線啞火

雖然朗尼係想交齣好戲證明自己，不過呢位前鋒近年狀態下滑，喺世盃踢過晒左、中、右唔同位置，同樣表現麻麻，就算想交貨都唔知點幫手至好。拍檔史杜列治踢國家隊冇喺利物浦咁sharp，唔通旨意啱啱畀曼聯掃走嘅韋碧克咩！
大賽冇料到 英粉唔入場打氣

英軍近年大賽成績欠佳，就連當地英粉都冇眼再睇落去。據英足總估計今晚可能得3.5至4萬人入場打氣，極有可能打破英軍近年喺溫布萊球場嘅最低入座紀錄，認真羞家。睇見原本坐足9萬人嘅球場吉位仲多過人，連個勢都輸埋，一眾英兵仲邊有心機應付呢場太公波吖。

對手挪威近6次同「三獅軍團」交手只係輸過1次咁多，表現硬淨。講真呢支北歐球隊球員身形普遍高大健碩，最怕對手採用細膩嘅小組入滲踢法。偏偏英軍組織力差，冇埋謝拉特校炮隨時淨係識得亂咁跑，就算改派列基林拔踢番英式足球都唔似佔到咩甜頭，咁好難捧得英軍落手啫。
Data King：挪威近10戰作客5場無波入

‧雙方近6次交手，英軍取得1勝3和2負成績。

‧雙方連續5次交手都開出入球細。

‧挪威近10戰作客僅1勝，當中5場食白果。
乜都玩錦囊：三獅兵 挪威冇攻「細」

英軍主力射手史杜列治、朗尼開季表現一般，同樣3戰入得1球，狀態唔夠Fit。翻查紀錄，「三獅軍團」近8場比賽只得2場可以射入2球或以上，進攻明顯唔夠力，冇埋謝拉特校炮，隨時連死球威脅力亦大大減弱。對手挪威鋒力同樣唔掂，近10場比賽有一半都係食白果，1.92倍入球細抵玩。
盤路解碼：英格蘭今年有5場「讓主」比賽只係贏過1次。