西班牙征法國追細盤

猪拉多纳

冇咗沙維唔敢亂嚟

今晚最矚目嘅國際熱身賽，非法國主場硬撼西班牙莫屬。不過兩支歐洲勁旅各有隱憂，「鬥牛國」飽歷世盃沉重打擊，兼且要習慣「沒有沙維的日子」，點都需要時間適應，法國唔單止有列貝利退出國家隊，前線重心賓施馬亦唔多弗，況且近年對碰例少波入，轉玩細盤好過。

（周五凌晨3時開賽）

之前連奪三屆大賽冠軍嘅西班牙，經過今夏極度失意、於分組賽出局嘅世盃，主帥迪保斯基勢必要進行大革新。度士都做過球員，明白到近年成班「鬥牛士」贏得太多，明顯唔夠飢渴感再去爭取榮譽，隨住老將沙維及沙比阿朗素退出國家隊，正好給予迪帥換血嘅契機。不過沙維係定義tiki taka踢法嘅核心人物，冇咗呢名巴塞隊長掌控全局，無論迪帥沿用tiki taka抑或改變戰術，眾將都需要重新適應「沒有沙維的日子」。就算一些新血如佐治高基、馬斯巴查、艾斯高等潛質優厚，「鬥牛國」亦難免要經歷一段調整期。

另一邊廂，法國喺冇咗受傷嘅「拜仁國王」列貝利之下，能夠於世盃殺入八強，最終遭冠軍德國淘汰可謂雖敗不辱。不過列貝利上月中宣布退出國家隊，咁啱又撞正前線重心賓施馬唔多弗，後備中鋒基奧特又重創抖到年尾，睇嚟對攻力點都有影響。
對賽往績少交收

其實法國同西班牙近年都幾有緣，近六年曾經五度交手，無獨有偶全部都係一球起、兩球止冇乜交收，加上處於新舊交接嘅西班牙，嚟緊會喺歐國盃外圍賽出戰馬其頓，佢哋於呢場無關痛癢嘅熱身賽有所保留亦唔出奇，度士認為會延續傳統唔慌多波入，當然法國有地利會秤先少少。