英乙開盤有直播夠新鮮 盧頓讓波唔怕反

猪拉多纳

由於撞正國際賽前後嘅空檔期，今晚英國波早場罕有地有英乙開盤及直播，都咪話唔新鮮，由久違嘅老牌球隊盧頓主場迎戰普利茅夫。雖然盧頓經過多年沉淪後，今季成功升番上乙組，但明顯未適應不停交學費，況且陣中傷停滿營，就算有地利都讓唔起夫添出擊嘅普利茅夫，讓球客勝咪錯過。

（TVB 301周六晚7時15分直播）

資深嘅英國波球迷相信對盧頓唔會太陌生，呢支擁有129年歷史嘅老牌球隊，80年代曾喺英國頂級聯賽打滾，甚至攞過英格蘭聯賽盃，可惜自92年降班後，成績每況愈下，08至09年球季更因財政問題被扣30分咁多，最終再降一級由英乙淪落到第五級聯賽，令人唏噓。
普利茅夫有英超兵助陣

經過四季嘅努力，盧頓今季終於重返乙組，但除咗開咧戰打響頭炮，之後四仗都冇贏過，明顯未適應乙組節奏，唔單止主力莊拿芬史密夫及阿歷士羅利斯養緊傷，上仗「紅牌阿姑」馬特羅賓遜亦要坐波監。

相反，普利茅夫上仗有中場核心李爾確斯復任正選，連帶激活埋前線拍檔路易斯亞歷山德拉，後者入波兼助攻令普軍擊敗修安聯重上勝軌，近日更借得英超分子史雲斯年輕中場阿歷士比雷，此消彼長之下，今仗作客勢頹嘅盧頓至少可全身而退，仲有得受讓咁筍，梗係揀讓球客勝喇。