荷蘭砌捷克冇優細

猪拉多纳

希丁克玩番433 洛賓又缺陣

由一位名帥換上另一位名帥，球隊仍可保持佳績？由名帥尹戈爾帶領嘅荷蘭喺今夏巴西世盃表現不俗，最終以季軍完成賽事。世盃過後，「橙衣軍團」改由「神奇教練」希丁克執教，雖然大家都係名帥，但兩位教頭嘅戰術理念各有不同，球員都要重新適應，再加上喺多位主力缺陣下，希丁克首戰熱身賽對意大利即遇滑鐵盧實屬正常。荷蘭今次歐國盃外圍賽A組首戰就要作客捷克，以球隊依家嘅攻力，要攻入捷克實在有難度，細盤值捧。

（有線61及201台周三凌晨2時45分直播）
尹佩斯失兩翼支援

荷蘭身處A組，同紅對手包括捷克、冰島、拉脫維亞、土耳其及哈薩克，前主帥尹戈爾放棄荷蘭傳統嘅4-3-3陣式，改用3-5-2陣式出戰世盃，獲得一致好評，不過希丁克一上任立即改番踢4-3-3，上場熱身賽對意大利，球員明顯未習慣踢呢個陣，結果開波10分鐘內就失咗兩球。好彩今場對手捷克已經今非昔比，進攻主要靠路斯基一個，相信荷蘭唔會一開波就被捷克打亂陣腳。

除陣式有所改變外，希丁克面對更大嘅難題係洛賓因傷缺陣，呢位「小飛俠」係球隊進攻泉源，比史奈達、尹佩斯等球星更為重要，荷蘭喺世盃期間踢法以守為主，然後以洛賓為重心打快速反擊，冇咗洛賓嘅速度、射術、突破能力同創造力，「橙衣軍團」嘅攻力即刻降咗一個「呢」。再加上從希帥上場派出嘅正選球員嚟睇，左右兩邊分別係古積特同謝明蘭斯，兩個都係富有國家隊經驗嘅球員，反而喺世盃有突出表現嘅20歲翼鋒迪比就出都冇得出，睇嚟希丁克唔似得尹戈爾咁夠膽重用年輕球員，結果大大減低球隊活力，34歲嘅古積特雖然仍然體力充沛，勤力走動，但佢一向都係一位防守型翼鋒，進攻上無甚貢獻，冇咗兩翼支援嘅尹佩斯簡直就似斷咗雙臂，入波有難度。
施治誓證寶刀未老

捷克進攻雖然唔掂，好彩後防仲有鋼龍施治鎮守，呢位32歲門將喺車路士畀泰拔高圖爾斯搶去正選門將一位，谷埋一肚火，今次佢返到國家隊誓要證明自己寶刀未老，用出色嘅表現令車仔領隊莫連奴回心轉意，加上雙方實力有距離，捷克應會在中後場囤重兵，以唔輸為首要目標，荷蘭要破門並唔輕易，今場捧入球細好路。