5護法硬淨守科隆一細

猪拉多纳

今屆德甲僅有嘅兩支升班球隊今晚對撼，柏達邦主場迎戰科隆，兩軍同以不敗身位列前4位置，上輪更分別作客擊敗漢堡同史特加，演出同樣帶來驚喜，不過黑柴認為係德甲球隊未摸熟佢哋踢法所致，今晚佢哋對壘就熟晒路，估計唔會踢得好開放，上季兩軍喺德乙兩循環交手都開細盤，值得再追。

（周六晚9時30分開賽）

科隆上季季前喺奧地利維也納撬走「防守大師」史杜加執掌帥印，最終除咗以德乙冠軍身分回升德甲外，仲以34場僅失20球嘅佳績，創下德乙失球最少紀錄，失球數字甚至比德甲班霸拜仁更低。年僅21歲嘅漢恩係上屆德乙最佳門神，佢同防線由右至左嘅碧高、奇雲雲馬、馬洛、祖拿斯赫達組成5大護法，硬淨到極，合拍到暈。佢哋上到嚟德甲一樣咁醒，開咧至今踢咗兩場德甲同一場德國盃，仍然保持一球不失。穩陣行先嘅史杜加喺升班後本來一口氣搵嚟斯洛伐克國腳施雲圖、阿爾巴尼亞國腳馬拉積同向車路士借得捷克年輕國腳卡拿斯3大守將，但睇見原來嘅5大護法穩陣成咁，3位新兵惟有繼續喺後備席等機會啦！
上季咬唔入柏達邦

科隆靠守起家，作客踢得特別穩陣，上季喺德乙17場作客賽事，有11場開細盤，8仗保持零失球，但對柏達邦卻冇乜辦法，作客和1比1，主場更加輸0比1，今晚作客唔敢過分搶攻。